"ފީބުޔޫތު” ގެ ނަމުގައި ސިލްސިލާ އިލްމީ ކްލާސްތަކެއް، އާންމުކޮށް ހުޅުވާލައިގެން ބާއްވަން ހަމަޖައްސާފައިވާ ކަމަށް ނޫރުލް އިސްލާމް ޖަމިއްޔާއިން ހާމަކޮށްފިއެވެ.
އައްޑޫ ސިޓީ، ހިތަދު އާއި މަރަދޫގައި ބޭއްވުމަށް ހަމަޖެހިފައިވާ މިކްލާސްތަކާއި ބެހޭ ގޮތުން މައުލޫމާތު ދެއްވަމުން ނޫރުލް އިސްލާމް ޖަމިއްޔާގެ އޮފިޝަލަކު ވިދާޅުވި ގޮތުގައި، މި ކުލާސްތަކަކީ އަލް އަސްރު ޖަމިއްޔާ އާ ގުޅިގެން ނޫރުލް އިސްލާމުން ކުރިއަށް ގެންދާ ކްލާސްތަކެއް ކަމަށެވެ.
މިގޮތުން ހިތަދޫގައި ހުކުރު ދުވަހުގެ މައުޜިބް ނަމާދަށް ފަހު ބާބުލް ހައިރީގައި ކުލާސް ކުރިއަށް ގެންދާނެ އެވެ. އެ ކްލާހުގައި އުސޫލުއް އައްސަލާސާގެ މައްޗަށް ވާހަކަ ދައްކަވާނީ ޝެއިހް މުހައްމަދް އަނީލް އެވެ.
މަރަދޫގައި އޮންނަ ކުލާސް ކުރިއަށް ގެންދަން ހަމަޖެހިފައި ވަނީ ކޮންމެ ހުކުރު ދުވަހެއްގެ އަސްރު ނަމާދަށް ފަހު، އެ އަވަށު މަސްޖިދުލް އިހްލާސްގަ އެވެ. އަންނަ ހުކުރު ދުވަހު އޮންނަ ކުލާހުގައި އަގީދަތުއް ސަހީހާގެ މައްޗަށް ވާހަކަ ދައްކަވާނީ ޝެއިހް މުހައްމަދު ނާޒިހް އެވެ.
އާންމުކޮށް ހުޅުވާލައިގެން ކުރިއަށް ގެންދާ ކްލާސްތަކަކަށް ވާތީ، މި ކްލާސްތަކުގައި ގިނަ ބަޔަކު ބައިވެރިވުމަކީ ވަރަށް ބޮޑަށް އެދޭ ކަމެއް ކަމުގައި ނޫރުލް އިސްލާމް ޖަމިއްޔާއިން ވަނީ ބުނެފައެވެ.\
އަލް-އަސްރު ޖަމިއްޔާ އާއި ނޫރުލް އިސްލާމް ގުޅިގެން ވަރަށް ފަހުން ވެސް ވަނީ ދީނީ ނަސޭޙަތް ދިނުމުގެ ޕްރޮގްރާމެއް އައްޑޫ ސިޓީގައި ކުރިއަށް ގެންގޮސްފައެވެ. އެ ޕްރޮގްރާމަށް ވެސް ވަރަށް ބޮޑު ތަރުޙީބެއް ލިބިގެން ގޮސްފައިވާކަން ފާހަގަކޮށްލެވެއެވެ.