ތިމާވެށި ރައްކާތެރިކުރަން ރާއްޖެއަށް އެހީތެރިކަން ފޯރުކޮށްދޭން ޝައުގުވެރިވާ ކަމަށް ޖަޕާނުން ބުނެފި އެވެ.
މިނިސްޓަރ އޮފް ކްލައިމެޓް ޗޭންޖް އެންވަޔަރަންމަންޓް، އެންޑް އެނަރޖީ އޮނަރަބަލް ޠާރިޤް އިބްރާހީމް، މިއަދު ވަނީ ޖަޕާނުން ރާއްޖެ ވަޑައިގެން އުޅުއްވާ ޖަޕާނުގެ ވަފުދަކާ ބައްދަލުކުރައްވައިފި އެވެ.
މި ބައްދަލުވުމުގައި ދެ ފަރާތުން މަޝްވަރާކުރެއްވި މައިގަނޑު މަޢުޟޫއަކީ ޖަޕާނުގެ އެހީއާއި އިންވެސްޓްމަންޓްތަކުގެ ޒަރީޢާއިން ރާއްޖޭގައި އިއާދަކުރަނިވި ހަކަތަ އާއި ލޯ އެމިޝަން ތަރައްޤީގެ ފުރުޞަތުތައް ކުރިއެރުވުމެވެ. މިނިސްޓަރ ޠާރިޤް މި ބައްދަލުވުމުގައި ވިދާޅުވީ ދެ ޤައުމުގެ ދެމެދުގައި އޮތް ގުޅުން އިތުރަށް ބަދަހިކުރުމަށް މަސައްކަތްކުރައްވާނެ ކަމަށެވެ.
ޖަޕާނުގެ ވަފުދުން ވަނީ ރާއްޖެއަކީ ތިމާވެށި ރައްކާތެރިކުރުމަށް ގިނަގުނަ މަސައްކަތްތަކެއް ކުރަމުންދާ ޤައުމެއްކަމާއި، މި ދާއިރާއިން ރާއްޖެއަށް އެހީތެރިވުމަށް ޝައުޤުވެރިވާ ކަމަށް ވިދާޅުވެފަ އެވެ.
މި ބައްދަލުވުމަކީ ދެ ޤައުމުގެ ދެމެދުގައި އޮތް ގުޅުން އިތުރަށް ހަރުދަނާކޮށް، ތިމާވެށި ރައްކާތެރިކުރުމުގެ ދާއިރާއިން އިތުރު ފުރުޞަތުތަކެއް ހޯދުމަށް މަގުފަހިވެގެންދާނެ ބައްދަލުވުމެއް ކަމަށް އެންވަޔަރަމެންޓް މިނިސްޓްރީން ބުނެ އެވެ.