ދަ ޑިމޮކްރެޓްސްގެ ރައީސް އާއި ނައިބު ރައީސް ކަމަށް ކުރިމަތިލާން ހުޅުވާލައިފި އެވެ.
ޑިމޮކްރެޓްސްގެ ރައީސް ކަމުގެ މަގާމުގައި ހުންނެވި ހަސަން ލަތީފް އާއި ނައިބު ރައީސްގެ މަގާމުގައި ހުންނެވި މުހައްމަދު ޝިފާޒު ވަނީ އެ ޕާޓީ ދޫކޮށް އެމްޑީޕީއާ ދާދިފަހުން ގުޅިވަޑައިގެންފަ އެވެ.
ޑިމޮކްރެޓްސްގެ ވަގުތީ ރައީސަކަށް ހަމަޖައްސާފައިވަނީ މަޑަވެލީ ދާއިރާގެ ކުރީގެ މެންބަރު ހުސެއިން ފިރުޝާން އެވެ.
ޑިމޮކްރެޓްސް އިން ނެރުނު އިއުލާނެއްގައި ބުނީ މި މަގާމުތަކަށް ވާދަކުރުމަށް އެދޭ އެ ޕާޓީގެ މެމްބަރުންނަށް، މިއަދުން ފެށިގެން މި މަހުގެ 23 ގެ ނިޔަލަށް ހުޅުވާލާފައިވާ ކަމަށެވެ.
އިންތިހާބުގައި ވާދަކުރުމަށް އެދޭ ޕާޓީގެ މެމްބަރުން، އެކަމަށް އެދި ޕާސްޕޯޓު ސައިޒުގެ ފޮޓޯއަކާއި އަދި އައިޑީ ކާޑުގެ ސާފު ކޮޕީއަކާއެކު އީމެއިލް މެދުވެރިކޮށް ހުށަހެޅުމަށް ވަނީ އެދިފަ އެވެ.
މި މަގާމުތަކަށް މެމްބަރުން އިންތިހާބުކުރުމަށް ބާއްވާ އެތެރޭގެ އިންތިހާބު އޮންނާނީ އަންނަ މަހުގެ 15 ގައި ކަމަށް ޑިމޮކްރެޓްސްގެ އިއުލާނުގައިވެ އެވެ.