މި ފެށުނީ އެމެރިކާގެ ރަން އަހަރުތައް ކަމަށް އެގައުމުގެ އާ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.
ވެރިކަމުގެ ހުވާ ކުރެއްވުމަށް ފަހު ދެއްވި ފުރަތަމަ ތަގުރީރުގައި ޓްރަމްޕް ވިދާޅުވީ އެމެރިކާގެ ރަން އަހަރުތައް މި ފެށުނީ ކަމަށާއި މިއަދުން ފެށިގެން އެމެރިކާ ކުރިއަށް ދާނީ އެންމެންގެ އިހުތިރާމް ލިބިފައިވާ ގައުމެއްގެ ގޮތުގައި ކަމަށެވެ. އަދި އެމެރިކާ ވެއްޓެމުން އައި ވެއްޓުން މިވަގުތުން ފެށިގެން ނިމުނީ ކަމަށާއި އޭނާ ގެންގުޅުއްވާނީ "އެމެރިކާ ފަސްޓް" އެޖެންޑާއެއް ކަމަށް ޓްރަމްޕް ވިދާޅުވި އެވެ.
ޓްރަމްޕް ވިދާޅުވީ އެމެރިކާގައި ގަވާއިދާ ހިލާފަށް އުޅޭ ބިދޭސީންގެ މައްސަލަ އާއި ތަކެތީގެ އަގު އިންތިހާއަށް މަތިވެގެންދިޔުމާއި ތަފާތު އެކި ހަނގުރާމަތަކުގައި އެމެރިކާ ސަރުކާރުން އަމަލުތައްކޮށްފައިވާ ގޮތުގެ ސަބަބުން ރައްޔިތުންގެ އިތުބާރު ސަރުކާރަށް ގެއްލުމުގެ މައްސަލަތަކެއް ކުރިމަތިވެފައިވާ ކަމަށެވެ. ނަމަވެސް މިއަދުން ފެށިގެން އެ ހުރިހާ ކަމަކަށް ބަދަލުތައް ގެންނާނެ ކަމަށާއި ކުރިއަށް އޮތް ތަނުގައި އެއްވެސް ގައުމަކަށް އެމެރިކާގެ ފަރާތުން ފައިދާ ނަގަން ފުރުސަތު ނުދެއްވާނެ ކަމަށްވެސް ޓްރަމްޕް ވިދާޅުވި އެވެ.
އަދި ބޭރު ގައުމުތަކުން އެމެރިކާއަށް އެތެރެކުރާ މުދަލުން ޓެކްސް ނަގައި، އެމެރިކާ ރައްޔިތުން މުއްސަނދިކޮށްދެއްވާނެ ކަމަށްވެސް ޓްރަމްޕް ވިދާޅުވި އެވެ.
މީގެއިތުރުން ޓްރަމްޕް ވަނީ މިއަދުން ފެށިގެން އެމެރިކާ ސަރުކާރުގެ ރަސްމީ ސިޔާސަތުގައި އޮންނާނީ ދެ ޖިންސު ކަމަށާއި އެއީ އަންހެނުންނާއި ފިރިހެނުންކަން ވެސް އިއުލާން ކުރައްވާފަ އެވެ.
އުމުރުފުޅުން 78 އަހަރުގެ ޓްރަމްޕަކީ އެމެރިކާގެ ރައީސްކަމުގެ މަގާމާއި ހަވާލުވެވަޑައިގެންނެވި 47 ވަނަ ފަރާތެވެ.
މިއީ ޓްރަމްޕްް އެމެރިކާގެ ރައީސްކަން ކުރައްވާ ދެވަނަ ފަހަރެވެ. އޭނަ އެމެރިކާގެ ރައީސްކަން ފުރަތަމަ ކުރެއްވ 2016-2020 އަށެވެ.