ރާއްޖޭގެ އެންމެ ބޮޑު ކޯލްޑް ސްޓޯރޭޖް ފެލިވަރުގައި ގާއިމު ކުުރަން ހަވާލުކޮށްފައިވާ އިންޑިއާގެ ކުންފުންޏާ، މިފްކޯގެ އާ ސީއީއޯ ޑރ. ވިތާލީ ލުބިމޯވް ބައްދަލު ކުރައްވައި އެ މަޝްރޫއުގެ މަސައްކަތާ ގުޅޭ ގޮތުން މަޝްވަރާ ކުރައްވައިފަ އެވެ.
އެ މަޝްވަރާ ބައްދަލުވުމުގައި ސީއީއޯ ވަނީ ތާވަލާ އެއްގޮތަށް މަސައްކަތް ނިންމައި ދިނުމަށް އެދިވަޑައިގެންފަ އެވެ.
ފެލިވަރުގައި 4،000 ޓަނުގެ ކޯލްޑް ސްޓޯރޭޖެއް ގާއިމުކުރަން ހަވާލުކޮށްފައި ވަނީ އިންޑިއާގެ ރައިނެކް އިންޑިއާ ލިމިޓެޑާ އެވެ. އެ ކުންފުންޏާ އެ މަޝްއޫރު ހަވާލުކުރީ 2023 ގެ ޖެނުއަރީ މަހުގެ މެދުތެރޭގަ އެވެ.
ގާތްގަނޑަކަށް 23 މިލިއަން ޑޮލަރުގެ މި މަޝްރޫޢަކީ އިންޑިއާގެ އެގްޒިމް ބޭންކުގެ ލޯނު ފައިނޭންސްގެ ދަށުން ކުރިޔަށް ގެންދާ މަޝްރޫޢެކެވެ.
މިމަޝްރޫޢުގެ ދަށުން ފެލިވަރުގައި 4،000 ޓަނުގެ ކޯލްޑް ސްޓޯރޭޖް ގާއިމުކުރާ އިރު، މަޝްރޫޢުގެ ދަށުން ދުވާލަކު 200 ޓަނުގެ މަސް ފްރީޒްކުރެވޭ ބްރައިން ފްރީޒިން ފެސިލިޓީއަކާއި މަސް ފިނިކޮށް ބަހައްޓާ 80 ޓަނުގެ ރެފްރިޖަރޭޓަޑް ސީ ވޯޓާ ސިސްޓަމެއް ވެސް ޤާއިމުކުރަން ހަމަޖެހިފައިވެ އެވެ. އަދި ގއ. ގެމަނަފުށީގައި 50 ޓަނުގެ ބްލޮކް އައިސް ޕްލާންޓަކާއި 100 ޓަނުގެ އައިސް ސްޓޯރޭޖެއް ގާއިމު ކުރަން ރައިނަކްއާ ހަވާލުކޮށްފައިވެ އެވެ.
ޔުކްރޭނަށް ނިސްބަތްވާ ޑރ. ވިތާލީ މިފްކޯގެ ސީއީއޯގެ މަގާމާ ހަވާލުވެވަޑައިގަތީ މިދިޔަ މަހުގެ ތެރޭގަ އެވެ.