ފުލުހުން މިއަހަރަށް ހާއްސަކޮށްގެން ތައްޔާރުކުރި ކަލަންޑަރު ޕޮލިސް ކޮމިޝަނަރު ޢަލީ ޝުޖާއު އަށް އަރުވައިފި އެވެ.
ސީޕީ އިއްޔެ ކަލަންޑަރު އެރުވީ އޭގައި ހިމެނޭ ފޮޓޯތަކުގައި ބައިވެރިވި ކުޑަކުދިންނެވެ.
އެހެން އަހަރުތަކާ ހިލާފަށް މި އަހަރުގެ ކަލަންޑަރު ތައްޔާރުކޮށްފައި ވަނީ ކުޑަކުދިން މެދުވެރިކޮށް ފުލުހުންގެ މަސައްކަތްތައް ދައްކުވައި ދިނުމަށާއި ފުލުހުންގެ އަސާސްތައް ރަމްޒުކޮށް ދިނުމަށެވެ.
"އަދުގެ ކުޑަކުދިން: މާދަމާގެ ޚިދުމަތްތެރިން" އެ ތީމުގެ ދަށުން ތައްޔާރުކޮށްފައިވާ މި ކަލަންޑަރުގައި، ކުޑަކުދިން ފެނިގެން ދާނީ ފުލުހުން ބޭނުންކުރާ އެކި ޔުނީފޯމުގަ އެވެ. އެގޮތުން، ކުޑަކުދިން ފުލުހުންގެ މަސައްކަތް ދައްކުވައިދީ އަދި ތަފާތު އެކި ކަހަލަ ސީންތަކުގައި ހަރަކާތްތެރިވާ މަންޒަރު ކަލަންޑަރުން ފެނިގެން ދާނެ އެވެ.
ކަލަންޑަރަށް ސީޕީ ދެއްވާފައިވާ އާ އަހަރުގެ ތަހުނިޔާގެ މެސެޖުގައި އަދުގެ ކުޑަކުދިންނަކީ މި ގައުމުގެ މުސްތަގުބަލަށް ވީހިނދު، މާތްވި އިސްލާމް ދީނާއި ދިވެހި ގައުމުދެކެ ލޯބިވާ ހަރުދަނާ ޖީލެއް ބިނާކުރުމަށް އަޅުގަނޑުމެން އަޒުމް ކަނޑައަޅަން ޖެހޭ ކަމަށާ މިއަދުގެ މައުސޫމް ދަރިންނަކީ މާދަމާ މި މގައުމުގެ ސަލާމަތާއި ރައްކާތެރިކަން ކަށަވަރުކުރުމަށް ތިބި ހީވާގި ޒުވާނުންކަމަށް ވިދާޅުވެފައިވެ އެވެ.