ކުޑައިރު ދޮންބައްޕަގެ ފަރާތުން ވަރަށް ބޮޑަށް ގެވެށިއަނިޔާ ލިބުނު ކަމަށް އެކްޓަރު އަހުމަދު އާސިމް ބުނެފި އެވެ.
ރާއްޖެ ޓީވީން ގެނެސްދޭ "ފަސް ސުވާލު" ޕްރޮގްރާމްގައި އޭނަ ބުނީ ކުޑައިރުގެ ހަޔާތުގެ ވަރަށް ބޮޑު ބައި ހޭދަކުރަން ޖެހުނީ އަނިޔާ އާއި ދަތިކަމުގެ ތެރޭގައި ކަމަށެވެ. އެގޮތުން ދޮންބައްޕަގެ ފަރާތުން ޖިސްމާނީ ގިނަ އަނިޔާތަކެއް ލިިބިފައިވާ ކަމަށް ބުންޏެވެ.
އާސިމް ބުނި ގޮތުގައި އާއިލާގެ އެހެން ކުދިންނަށް ވެސް ދޮންބައްޕަގެ އެ އަނިޔާވެރިކަމާ ކުރިމަތިލާން ޖެހުނު ކަމަށެވެ.
ނަވާރަ ސަތޭކައިގެ ނުވަދިހައިގެ ފަހުކޮޅު ފިލްމީ ދާއިރާ އަށް ނުކުމެ އާންމުންގެ ސަމާލުކަން ހޯދި އެކްޓަރު ބުނީ ދޮންބައްޕަ އަކީ ހެޔޮ މީހެއް ނަމަވެސް ވަރަށް ރުޅިގަދަ މީހެއް ކަމަށެވެ. އެގޮތުން އޭނަ ރުޅި އައިސްފި ނަމަ އާއިލާގެ މީހުންނަށާއި ގޭގައި ހުންނަ ތަކެއްޗަށް ވެސް ގެއްލުންދޭ ކަމަށް ބުންޏެވެ.
އާސިމް ބުނި ގޮތުގައި އެ އުނދަގޫތަކުގެ ތެރޭގައި އުޅެން ޖެހުމުން ދިމާވި ކަންކަމާ ހެދި އުމުރުން 15 އަހަރުގައި ވަޒީފާއަކަށް ނުކުމެ އާމްދަނީ ހޯދަން ފެށި އެވެ. އެގޮތުން މިފްކޯގެ ވަޒީފާއަކަށް ގޮސް، މަސްކިރާ ބޯޓެއްގައި ވެސް މަސައްކަތްކުރި ކަމަށް ބުންޏެވެ.
މިހާރު ތިން ދަރިން ތިބި އެކްޓަރު ބުނި ގޮތުގައި މިފްކޯގައި ތިން އަހަރެއްހާ ދުވަހު އުޅުނެވެ. އަދި އޭރު މުސާރަ އަކީ 1،400ރ. ކަމަށް ބުންޏެވެ. އާސިމް ބުނީ އޭރަށް ބަލާ އިރު، އެއީ ހަމަ ވަރަށް ބޮޑު މުސާރައެއް ކަމަށެވެ.
އޭނަ ބުނީ ވަރަށް ކުޑައިރުއްސުރެ ފިލްމަށް ޝައުގުވެރިކަން އުފެދި، ފިލްމު ކުޅުމަކީ ވަރަށް ބޭނުންވި ކަމެއް ކަމަށެވެ. އޭނަ ފުރަތަމަ ފެނިގެން ދިޔައީ 1999 ގައި ވީޑިއޯ ލަވަކުންނެވެ.
އޭގެ ފަހުން ފިލްމުތަކާއި ޑްރާމާތައް ވެސް ކުޅެފައިވެ އެވެ. އާސިމް އެންމެ ފަހުން ފެނިފައިވާ ފިލްމަކީ މިދިޔަ އަހަރުގެ
"ލަސްވިޔަސް" އެވެ. އޭނަ ކުޅުނު ފާހަގަކޮށްލެވޭ ފިލްމުތަކުގެ ތެރޭގައި "ލޫދިފާ"، "އަޖާއިބު"، "އެ ދަތުރު"، "ދަރިންނަށްޓަކައި" އަދި "ހެޕީ ބާތުޑޭ" ހިމެނެ އެވެ.
އާސިމް ކުޅުނު ޓީވީ ސިލްސިލާތަކުގެ ތެރެއިން އެންމެ މަޝްހޫރުވި ސިލްސިލާ އަކީ "ވައިރޯޅި އަށް ވެސް ސިއްރުން" އެވެ. އަދި އޭނަގެ ވެބް ސީރީޒް "ގަމިނި" އަކީ ވެސް ބެލުންތެރިންގެ މެދުގައި ވަރަށް މަގުބޫލުވި އެއްޗެކެވެ.
އާސިމް، 43، އަކީ އެކްޓަރެއްގެ އިތުރުން ކެމެރާގެ ފުރަގަހުގައި ވެސް ތަފާތު މަސައްކަތްކުރާ އެކްޓަރެކެވެ. އެގޮތުން އޭނަ އަކީ މޮޅު އެޑިޓަރެއްގެ އިތުރުން ޑައިރެކްޓަރެއް ވެސް މެ އެވެ. މިދިޔަ އަހަރު އޮލިމްޕަހުގައި އެޅުވި ފިލްމުތަކުގެ ތެރޭގައި ހިމެނޭ ކުރު ފިލްމު "ޚަދީޖާ" އަކީ އާސިމްގެ ޑައިރެކްޝަނެކެވެ.