ތޫނު އެއްޗަކުން ދިން ހަމަލާތަކާ ގުޅިގެން އިންޑިއާގެ އެކްޓަރު ސައިފް އަލީ ޚާނަށް ހޮސްޕިޓަލްގައި ފަރުވާ ދިނުމަށް ފަހު މިއަދު ހަވީރު ދޫކޮށްލައިފި އެވެ.
މި މަހުގެ 16 ވަނަ ދުވަހުން ފެށިގެން 54 އަހަރުގެ އެކްޓަރަށް ފަރުވާ ދެމުން ދިޔައީ މުމްބާއީގެ ލީލާވަތީ ހޮސްޕިޓަލްގަ އެވެ. މި އެ ދުވަހުގެ މެންދަމު ސައިފާއި އާއިލާ ދިރިއުޅޭ އެޕާޓްމަންޓަށް ވައްކަން ކުރަން ވަން މީހަކު ވަޅިއަކުން ސައިފް ހަށިގަނޑުގެ ހަ ތަނަކަށް ހަމަލާދީ ޒަހަމްކޮށްލާފައިވެ އެވެ.
މިކަމާ ގުޅިގެން އޭނަ ސާޖަރީއެއް ވެސް ހަދަން ޖެހުނެވެ.
ސައިފް މިއަދު ހޮސްޕިޓަލުން ދޫކޮށްލި އިރު، އޭނަ އަށް ހަމަލާ ދިން މީހާ މީގެ ދެ ދުވަސް ކުރިން ވަނީ ހައްޔަރުކޮށްފަ އެވެ. އެއީ ބަންގްލަދޭޝް އަށް ނިސްބަތްވާ މުހައްމަދު ޝަރީފުލް އިސްލާމް ޝެހެޒާދު، 30، އެވެ. ފުލުހުން ބުނީ އޭނަ އިންޑިއާގައި އުޅެނީ ނަން، ބިޖޯއި ދާސް އަށް ބަދަލުކޮށްގެން ކަމަށެވެ.
ރިޕޯޓްތައް ބުނާ ގޮތުން މުހައްމަދަކީ މުމްބާއީގެ ރެސްޓޯރަންޓެއްގެ ވެއިޓަރެކެވެ. އޭނަ ހައްޔަރުކޮށް ބަންދާ މެދު ގޮތެއް ނިންމަން ހޯމަ އާދީއްތަ ދުވަހު ކޯޓަށް ހާޒިރު ކުރުމުން ބަންދަށް 5 ދުވަސް ޖަހާފައިވެ އެވެ.