ވެމްކޯ އިން ކުނި ނަގަން ދާދި ފަހުން ބަދަލު ގެނައި އިރު، އެކަމާ ގުޅޭ ގޮތުން ކައުންސިލާ މަޝްވަރާކޮށްފައި ނުވާ ކަމަށް މޭޔަރު އަލީ ނިޒާރު ވިދާޅުވެއެއްޖެ އެވެ.
މޭޔަރު ސޯޝަލް މީޑިއާ ޕޯސްޓެއްގައި މިއަދު ވިދާޅުވީ ކައުންސިލާ މަޝްވަރާ ކުރުމެއް ނެތި ވެމްކޯ އިން އަގަށް ބަދަލު ގެނައި އިރު، އައްޑޫގެ އާންމު ސަރަހައްދުތަކުންނާއި މިސްމިތްތަކާއި އޮފީސްތަކާއި އަދި ޕާކްތަކުގެ ކުނި އަގު ދީ ކައުންސިލްއިން ޖަމާކުރަމުން ގެންގޮސްފައި ވަނީ ވެމްކޯ އިން ބަލަހައްޓާ ކުނި ކޮއްޓަށް ކަމަށެވެ.
ނަމަވެސް އަގަށް ގެނައި ބަދަލާ އެކު އެ ތަންތަނުން ކުނި ކޮއްޓަށް ވެއްދުމަށް ދުވާލަކު 50،000ރ. ދައްކަން ޖެހިފައިވާ ކަމަށް ވިދާޅުވި އެވެ.
"އެއްވެސް ވިސްނުމެއް ދިރާސާއެއް މަޝްވަރާއެއް ނެތި މި ޒާތުގެ ދެއުޅިއެއް ނުވާ ނިންމުންތައް ސަރުކާރުން ނިންމަމުން އަދި ބަދަލު ކުރަމުން ދިއުމަކީ ރައްޔިތުންނަށް ދެވޭ ހިދުމަތްތައް ދިނުމަށް އުމދަގޫތައް ދިމާވެ ހުއްޓަން ދިމާވެދާނެ ކަމެއް،" ނިޒާރު ވިދާޅުވި އެވެ. "މި ޖެނުއަރީ މަހުން ފެށިގެން އައްޑޫގެ އާއްމު ސަރަހައްދުތަކުން ނެގޭ ކުނި ގެންދެވޭނެ ތަނެއް ނެތި ފުނިޖެހެމުންދާކަން ފާހަގަ ކުރެވޭ."
އޭނަ ވިދާޅުވީ މި މައްސަލާގައި ކަމާ ގުޅުން ހުރި ފަރާތްތަކާ މަޝްވަރާ ކުރެވުނަސް އަދިވެސް ހައްލު ހޯދިފައި ނުވާ ކަމަށެވެ.
މި މަހުގެ 1 އިން ފެށިގެން އައްޑޫގައި ހުކުރު ދުވަސް ފިޔަވައި ހުރިހާ ދުވަހެއްގައި ގޭބިސީތަކުން ކުނި ނަގަމުން އަންނަ އިރު، އެކަމަށް މަހަކަށް ނަގާނީ 150ރ. އެވެ. ކުރިން ހަފުތާ އަކު ދެ ދުވަހު ގޭބިސީތަކުން ކުނި ނަގާ އިރު، އަގަކީ 100ރ. އެވެ.