ދުބާއީގެ އެންމެ ކުރިއަރާފައިވާ ރިއަލް އެސްޓޭޓް ކުންފުނި، ސަމަނާ ޑިވެލޮޕާސް އިން ރާއްޖޭގައި 598 މިލިއަން ޑޮލަރުގެ ބޮޑު އިންވެސްޓުމެންޓަކާ އެކު ރިސޯޓެއް ތަރައްގީ ކުރަން ނިންމައި އެކަން މިއަދު އިއުލާނުކޮށްފި އެވެ.
ދުބާއީގެ މަދީނަތު ޖުމެއިރާގައި މިއަދު ބޭއްވި އިވެންޓެއްގައި މި ޕްރޮޖެކްޓް އިފްތިތާހުކުރިއިރު، މި ރިސޯޓު ތަރައްގީ ކުރުމަށް ހަމަޖެހިފައިވަނީ ހދ. ހަނިމާދޫ ކައިރީގަ އެވެ.
މި ރިސޯޓުގައި 109 ލަގްޒަރީ ރެސިޑެންޝަލް ރޫމު ހުންނައިރު، އޭގެތެރޭގައި ބީޗް ފްރޮންޓް ވިލާ އާއި، އޯވަ ވޯޓާ ބަންގަލޯގެ އިތުރުން ޕޫލް ސައިޑް އެޕާޓްމެންޓްތައް ވެސް ހުންނާނެ އެވެ. އެގޮތުން މި ރިސޯޓުގެ ހުރިހާ ރޫމެއް ވެސް ހެދުމަށް ނިންމާފައިވަނީ ރާއްޖޭގެ ގުދުރަތީ ރީތިކަން ދައްކުވައިދޭ ފަދަ ގޮތަކަށެވެ.
މި ރިސޯޓުގެ ޑިޒައިނިންގެ މަސައްކަތްތައް ކުރުމަށް ހަމަޖެހިފައިވަނީ ލުބްނާނަށް ނިސްބަތްވާ އެލީ ސާބް ގްރޫޕުންނެވެ.
މި ޕްރޮޖެކްޓުގެ މަސައްކަތް 2029 ގެ ނިޔަލަށް ނިންމުމަށް ވަނީ ހަމަޖެހިފަ އެވެ.