ސަރުކާރު ހިންގާ ޕީއެންސީ އަކީ އެންމެ ވަގުން ގިނަ ޕާޓީ ކަމަށް، ކުރީގެ ރައީސް އަބްދުﷲ ޔާމީން ވިދާޅުވެއްޖެ އެވެ.
ޕީއެންއެފްގެ ފްރޮންޓް އޮފީހުގެ ޖަލްސާގައި ރޭ ވާހަކަފުޅުދައްކަވަމުން ޔާމީން ވިދާޅުވީ މި ސަރުކާރު ހުރިހާ ތަނެއްގައި އޮތީ ކޮރަޕްޝަން ކަމަށާއި އެކަން ކުރަނީ ރައީސް ޑރ. މުހައްމަދު މުއިއްޒަށް އެނގިގެން ކަމަށެވެ. ރައީސް މުއިއްޒު އެކަމާ ދެކޮޅު ނަމަ ކޮރަޕްޝަން ހިންގާ މީހުންނަށް މިހާރު ހުންނާނީ ފިޔަވަޅު އަޅާފައި ކަމަށާއި، މިހާ ހިސާބަށް މިފަދަ ކަންކަން ދިޔައީ ރައީސް މުއިއްޒު އެކަމަށް ހިތްވަރު ދެއްވާތީ ކަމަށް ޔާމީން ވިދާޅުވި އެވެ.
ޔާމީން ވިދާޅުވީ ރައްޔިތުން ހަޅޭލަވައިގަތުމުން ކޮރަޕްޝަންގެ އަމަލުތައް ހިންގި ބައެއް މީހުން މަގާމުތަކުން އިސްތިއުފާދީ އަދި މަގާމުތަކުން ދުރަށް ދިޔަ ނަމަވެސް އޭގެއިން މީހަކަށް ފިޔަވަޅެއް ނާޅާ ކަމަށާއި އެފަދަ ފަރާތްތަކުގެ މައްޗަށް ތަހުގީގެއް ވެސް ހިންގަން ބޭނުން ނުވަނީ މީގެތެރެއަށް ރައީސް މުއިއްޒުގެ ނަންފުޅު އަންނާނެތީ ކަމަށެވެ. އަދި މި ސަރުކާރުގައި މިހާރު ތިބީ ފާޅުކަން ބޮޑު ގޮތެއްގައި ކޮރަޕްޝަންގެ އަމަލުތައް ހިންގާ ބޭފުޅުން ކަމަށްވެސް ޔާމީން ވިދާޅުވި އެވެ.
"އެހެންވީމަ އެންމެ ގިނަ މެމްބަރުން ތިބި ޕާޓީގެ ލަގަބެއް ނޫން ލިބެންވީ. ފަހުރުވެރިވާންވީ އެންމެ ވަގުން ގިނަ ޕާޓީއަކީ މި ޕާޓީކަމަށް ބަލައިގެން، އެއަށް ފަހުރުވެރިވާންވީ. ނޫހުގެ ހެޑްލައިންތައް މިއަދު ކެޕްޗާ ކުރަންވީ އެންމެ ވަގުން ގިނަ، އެންމެ ކޮރަޕްޓް މީހުން ގިނަ، މުޅި ސަރުކާރު ދޮވެލައިފައި ނުކުމެ ތިބި ބައެއް މިހާރު މިތިބީ،" ޔާމީން ވިދާޅުވި އެވެ.
މި ސަރުކާރު ރައްޔިތުންގެ ވޯޓަކުން އިންތިހާބުވެފައި އޮތް ނަމަވެސް މި ސަރުކާރަށް ރައްޔިތުންގެ އިތުބާރެއް މިހާރު ނެތް ކަމަށާއި ވެރިކަން ކުރުމުގެ އަހުލިއްޔަތު ސަރުކާރުގައި ތިބި ބޭފުޅުންގެ ކިބައިން ނިގުޅިފައިވާ ކަމަށް ސިފަވެގެންދާ ކަމަށްވެސް ޔާމީން ވިދާޅުވި އެވެ.