އައްޑޫ ސިޓީގައި ހުންނަ މޯލްޑިވްސް އިންލޭންޑް ރިވެނިއު އޮތޯރިޓީ (މީރާ)ގެ އޮފީހުގެ ކުޑަ ދޮރުތައް ހުޅުވާފައި ހުންނަ ކަން ހާމަވެއްޖެއެވެ.
ރޭ އައްޑޫ ސިޓީއަށް ކުރި ވިއްސާރައިގައި ލިބުނު ގެއްލުންތަކާއި ބެހޭ މައުލޫމާތު ހޯދުމަށް މަސައްކަތް ކުރަމުން ދިޔަ 'އައްޑޫލައިވް'ގެ ޓީމަށް ވަނީ ކައުންސިލް އިދާރާގެ 2 ވަނަ ފަންގިފިލާގައި ހުންނަ މީރާގެ އޮފީހުގެ ކުޑަ ދޮރުތައް ހުޅުވާފައި ހުއްޓާ ފެނިފައެވެ.
މިކަމާއި ގުޅިގެން މީރާގެ އައްޑޫ އޮފީހުގެ މުވައްޒަފަކާއި ގުޅުމަށް 'އައްޑޫލައިވް' އިން ކުރި މަސައްކަތް ވަނީ ކާމިޔާބު ވާގޮތް ނުވެފައެވެ.
މީގެ އިތުރުން ވެސް އައްޑޫ ސިޓީ ކައުންސިލް އިދާރާގެ ވަރަށް ގިނަ ކުޑަ ދޮރުތަކެއް ތަޅު ނުލައި ހުރިކަން ވަނީ ފާހަގަކުރެވިފައެވެ.
އައްޑޫ ސިޓީ ކައުންސިލް އިދާރާގެ ބައެއް ކުޑަދޮރުތައް ތަޅު ނުލާ ހުރިކަން ފާހަގަކުރެވިފައިވާ އިރު، އެ ތަނުގެ ސެކިއުރިޓީ ބަލަހައްޓަން ހުންނަނީ އެންމެ މީހެކެވެ.
'އައްޑޫލައިވް' އަށް މައުލޫމާތު ލިބިފައިވާ ގޮތުގައި ކައުންސިލް އިދާރާ ކޮންމެ ދުވަހަކުވެސް ބަންދު ކުރުމަށް ފަހު ތަޅުދަނޑި ގެންގޮސް ހަވާލު ކުރަނީ ހިތަދޫ ޕޮލިސް ސްޓޭޝަނާއި އެވެ.
ކައުންސިލް އިދާރާގެ ތަޅުދަނޑި އާއި ހަވާލުވާ ހިތަދޫ ޕޮލިސް ސްޓޭޝަނުގެ ފަރާތުން، ތަޅުދަނޑީ އާއި ހަވާލުވުމުގެ ކުރިން ކައުންސިލް އިދާރާގެ ދޮރުތައް ރަގަޅަށް ތަޅު ލާފައި ތޯ ބެލުމަކީ ވަރަށް ވެސް މުހިއްމު ކަމަކެވެ.