ގައުމީ އެއާލައިން، މޯލްޑިވިއަން އިން އަލަށް ގެނައި ވައިޑް-ބޮޑީ މަތިންދާބޯޓުގައި ޗައިނާގެ ވެރިރަށް ބެއިޖިން އަށް ދަތުރުތައް ފަށައިފި އެވެ.
މޯލްޑިވިއަންގެ ވައިޑް-ބޮޑީ މަތިންދާބޯޓު ރާއްޖެ ގެނެސްފައިވަނީ މި މަހު 6 ގައި ކަމަށްވާއިރު، މިއީ ރާއްޖެއިން ބޭރަށް އެ ބޯޓު ކުރާ ދެވަނަ ދަތުރެވެ. އެ ބޯޓުގެ ދަތުރުތައް އެންމެ ފުރަތަމަ ކޮށްފައިވަނީ ޗައިނާގެ ޗެންގްޑޫ އަށެވެ.
Another milestone moment! ✈️ Our inaugural flight from Malé to Beijing has arrived in China’s capital, marking a new connection between the Maldives and Beijing. As a token of appreciation, we surprised our check-in passengers with special gifts to celebrate this historic… pic.twitter.com/3oK23cUxBF
— MaldivianAero (@MaldivianAero) January 24, 2025
މި ބޯޓުން ޗައިނާގެ 3 ސިޓީއަކަށް ދަތުރުތައް ބާއްވަން ހަމަޖެހިފައެވެ. އެއީ ޗެންގްޑޫ އާއި ބެއިޖިންގެ އިތުރުން ޝެންހާއި އެވެ. އެގޮތުން ޝެންހާއީ އަށް ދަތުރުތައް ފަށާނީ މި މަހުގެ 27 ގަ އެވެ.
ޗައިނާއަކީ މިދިޔަ އަހަރު އެންމެ ގިނަ ޓޫރިސްޓުން އައި ގައުމެވެ. މިދިޔަ އަހަރު ޗައިނާއިން 250،000 ޓޫރިސްޓުން ރާއްޖެއަށް ޒިޔާރަތް ކުރި އެވެ. މިއަހަރުގެ މިހާތަނަށް ވެސް ޗައިނާ އިން ރާއްޖެއަށް ވަނީ 15،891 ޓޫރިސްޓުން ވަނީ އައިސްފަ އެވެ.
މޯލްޑިވިންއަންގެ ހިދުމަތް ފުޅާކުރަން މި އަހަރުގެ އޮކްޓޯބަރުގެ ތެރޭގައި އިތުރު ވައިޑް-ބޮޑީ ބޯޓެއް ވެސް ގެންނަން ހަމަޖެހިފައިވެ އެވެ. އެގޮތުން ކުރިއަށް އޮތް ތަނުގައި ޔޫރަޕްގެ ގައުމުތަކަށް ވެސް ދަތުރުތައް ކުރާނެ އެވެ.
މީގެ ސަބަބުން އެ އެއާލައިނުން ރާއްޖެ އަށް އަހަރަކު 60،000 ފަސިންޖަރުން ގެނެވޭނެ ކަމަށް ބުނެފައިވެ އެވެ. އާ ބޯޓުގައި ތިން ކެޓަގަރީގެ ފަސިންޖަރުންނަށް ޚިދުމަތް ދޭނެ އެވެ އެއީ އިކޮނޮމީ، ބިޒްނަސް އަދި ޕްރީމިއަމް ކްލާހުގަ އެވެ. މިއީ 264 މީހުންގެ ޖާގައިގެ ބޯޓެކެވެ.