ރޭ އައްޑޫ އަށް ކުރި ވިއްސާރައާއި ގުޅިގެން، އެހީތެރިކަން ހޯދާލުމަށް ގުޅި އިރު ހައުސިން މިނިސްޓްރީގެ އެއްވެސް ބޭފުޅަކު، އައްޑޫގައި ނެތުމުން އެކަމާއި އައްޑޫގެ ގިނަ ބަޔަކު ހިތްހަމަނުޖެހުން ފާޅުކުރަމުން އެބަގެންދެއެވެ.
އައްޑޫ ސިޓީގެ ރައްޔިތުންނާއި ގާތުން ހައުސިން މިނިސްޓްރީގެ ހިދުމަތްތައް ދިނުމުގެ ގޮތުން މިނިސްޓްރީގެ ޑިޕާޓްމަންޓެއް ދާދި ފަހުން އައްޑޫގައި ހުޅުވި ނަމަވެސް، އެ ތަނުގައި މަސައްކަތް ކުރާ އިސްބޭފުޅުން ތިއްބެވީ މާލޭގައި ކަން 'އައްޑޫލައިވް' އަށް ވަނީ އެނގިފައެވެ.
ކައުންސިލް އިދާރާގެ އޮފިޝަލަކު 'އައްޑޫލައިވް' އަށް މައުލޫމާތު ދެމުން ބުނިގޮތުގައި، ރޭ ދަންވަރު އައްޑޫ އަށް ކުރި ވިއްސާރައިގައި ގެތަކަށް ބޮޑެތި ގެއްލުންތައް ލިބުނު ކަމުގެ ރިޕޯޓްތައް ލިބުމާއި އެކު، ކައުންސިލް އެލާޓަށް އައިސްފައިވާ ކަމަށެވެ.
"3 ޖަހާއިކަށް ހާއިރުން ފެށިގެން އަޅުގަނޑުމެން ނިކުމެގެން މިއުޅެނީ. ހައުސިން މިނިސްޓްރީގެ ބޭފުޅުންނަށް ގުޅަން ބަލާލިއިރު އެއިން ބޭފުޅަކު ފޯނެއް ނުނަންގަވާ. އެކަމަކު މިހާރު ޒިޔާދު އެބަ އުޅުއްވާ ވަޑައިގެން. ބައެއް ގެތަކަށް ވެސް ޒިޔާރަތް ކޮށްފި ކަމަށް ވޭ. " އޮފިޝަލް ވިދާޅުވިއެވެ.
ޒިޔާދު އައްޑޫ އަށް ވަޑައިގެންފައިވަނީ މިއަދު މެންދުރު އެހާކަށް ހާއިރުއެވެ. އެބޭފުޅާ އައްޑޫ އަށް ވަޑައިގެން ބައެއް ގެތަކަށް ޒިޔާރަތް ކުރެއްވުމަށް ފަހު ރަށު ތެރޭގެ ހާލަތު ބެލުމުގެ މަސައްކަތް މިހާރު ކުރަމުން އެބަގެންދެއެވެ.
"އައްޑޫލައިވް"އަށް މައުލޫމާތު ލިބިފައިވާ ގޮތުގައި ހައުސިން މިނިސްޓްރީގެ އެންމެ އިސްވެރިއަކަށް އައްޑޫގައި ހުންނެވި ޑރ. މުހައްމަދު އަލީ އައްޑޫން ފުރައިގެން ގޮސްފައިވަނީ މިއަދު ހެނދުނު 10 ޖެހި އިރުއެވެ.
ރޭ ދަންވަރުން ފެށިގެން އައްޑޫއަށް ބޯކޮށް ވާރޭވެހި އެތައް ބަޔަކު މަގުމަތިވެފައިވާއިރު ހައުސިން މިނިސްޓްރީގެ އެއްވެސް ހިލަމެއް ވެފައި ނުވެއެވެ.
ނަމަވެސް ހެނދުނުން ފެށިގެން، ކައުންސިލްގެ މުނިސިޕަލް ސާވިސް އާއި އެމްއެންޑީއެފް ސަދަން އޭރިއާގެ ސިފައިންނާއި، ފުލުހުން އަދި އެމްއާރްދީސީގެ ފަރާތުން ވަނީ ހާލުގައި ޖެހިފައިވާ އާއިލާތަކަށް އެހީތެރިކަން ފޯރުކޮށްދޭން ފަށާފައެވެ.