ފުލުހުންގެ ހިދުމަތްތަކާ މެދު ހިތްހަމަޖެހިވަޑައިގަންނަވާ ކަމަށާއި މިދިޔަ އަހަރަކީ ވެސް ރަނގަޅަށް ހިދުމަތް ދެވުނު އަހަރެއް ކަމަށް ގަބޫލުކުރައްވާ ކަމަށް ހޯމްލޭންޑް މިނިސްޓަރު އަލީ އިހުސާން ވިދާޅުވެއްޖެ އެވެ.
ރޭ ދ. ވާނީގައި ފުލުހުންގެ 38 ވަނަ އިނީޝިއަލް ޓްރެއިނިން ކޯހުގެ ދަސްވެނިވުމުގެ ރަސްމިއްޔާތުގައި މިނިސްޓަރު ރޭ ވިދާޅުވީ ފުލުހުންގެ އަބަދު ވެސް އަޒުމަކަށް ހަދަން ވަނީ އެއް ދުވަހުން އަނެއް ދުވަހަށް ހިދުމަތް ވީހާ ވެސް ރަނގަޅަށް ދޭން މަސައްކަތް ކުރުން ކަމަށެވެ.
އެގޮތުން ފުލުހުންހެ ޚިދުމަތަށް ނުކުންނަ ކޮންމެ ފުލުހަކު ވެސް މައިގަނޑު ހަތަރު ކަމެއްގައި ގަދައަޅައި ސައްކަތް ކުރަން ޖެހޭ ކަމަށް ވިދާޅުވި އެވެ. އެއީ މަސްތުވާތަކެތީގެ ވަބާއިން ޤައުމު ސަލާމަތް ކުރުމަށާއި، ގޭންގުތައް ނައްތާލުމަށާއި، ގަވާއިދާ ޚިލާފަށް އުޅެމުންދާ ބިދޭސީންގެ މައްސަލަ ޙައްލު ކުރުމުގެ އިތުރުން ކުށުގެ ވެއްޓަށް ހުށައެޅިފައިވާ އަދި ހުށައެޅެމުންދާ ކުޑަކުދިން ސަލާމަތް ކުރުން ކަަމަށް އިހުސާން ވިދާޅުވި އެވެ.
"ނިމިދިޔަ އަހަރަކީ ފުލުހުންގެ ފަރާތުން ރަނގަޅު ޚިދުމަތެއް ރައްޔިތުންނަށް ފޯރުކޮށް ދެވުނު އަހަރެއްކަމަށް އަޅުގަނޑު ޤަބޫލުކުރަން. ކޮންމެ އަހަރަކީ ވެސް އެއަހަރަށްވުރެ ޖެހިގެން އަންނަ އަހަރުގެ ޚިދުމަތް ފުރިހަމަވުމަށް އުއްމީދުކުރާނެ އަހަރެއް،" އޭނަ ވިދާޅުވި އެވެ. "އެހެންކަމުން މި އަހަރުވެސް ރަނގަޅު ޚިދުމަތެއް ރައްޔިތުންނަށް ފޯރުކޮށް ދިނުމުގެ ޢަޒުމް ކޮންމެ ފުލުހެއްގެ ވެސް އޮންނަން ވާނެ."
މިނިސްޓަރު ވިދާޅުވީ ފުލުހުން ރައްޔިތުންނަށް ހިދުމަތް ދިނުމުގައި އަބަދު ތިބެން ޖެހޭނީ އެންމެ ހިތް އެދޭ ތަންތަނުގައި ނޫން ކަމަށް ވެސް ގަބޫލު ކުރަން ޖެހޭ ކަމަށެވެ. އަދި ފުލުހުންގެ ހިދުމަތަކީ މަސައްކަތް ކުރަން އުނދަގޫ ތަނެއް ކަމަށާއި ގިނަ ރަށްތަކަށް ބެހިގެންވާ ގައުމެއްގައި އެއް ތަނުން އަނެއް ތަނަށް ދިޔުމަށް އުނދަގޫ ހާލަތަކަށް ބިނާވެފައިވާ ހިދުމަތެއް ކަމަށް ވިދާޅުވި އެ.
"މި ހިދުމަތުގައި އުޅޭ އިރު އަޅުގަނޑުމެންނަށް އަބަދު ހިދުމަތްކުރަން ލިބޭނީކީ އެންމެ ހިތް އެދޭ ތަނުގައެއް ނޫން. އެހެން ނަމަވެސް އެ މީހާގެ ޑިއުޓީ ކޮންމެ ދިމާލަކަށް ޖެހުނަސް އެންމެ ހިތް އެދޭ ގޮތަށް އެ ހިދުމަތް ދޭން އަޒުމް ކަނޑައަޅައިގެން ހިދުމަތުގެ ފެންވަރު އެންމެ ރަނގަޅަށް ދިނުމަކީ ކޮންމެ ފުލުހެއްގެ އަޒުމަކަށް ވާން ވާނެ." އިހުސާން ވިދާޅުވި އެވެ.