އައްޑޫ ސިޓީގެ ކަރަންޓުގެ މައްސަލައިގައި ފެނަކައިގެ އިސްވެރިން ރައްޔިތުންގެ މަޖިލީހުގެ ސްޓޭޓް އޯންޑް އެންޓަޕްރައިޒެސް ކޮމިޓީ (އެސްއޯއީ) އަށް ހާޒިރުކޮށްދޭން ހިތަދޫ މެދު ދާއިރާގެ މެމްބަރު އަހުމަދު އަޒާން ހުށަހަޅުއްވައިފި އެވެ.
ރައްޔިތުންގެ މަޖިލީހުގެ ރައީސް ރައީސް އަބްދުއްރަހީމް އަބްދުﷲ އަށް އަޒާން ފޮނުއްވި ސިޓީގައި ވިދާޅުވީ އައްޑޫގައި ފެނަކައިން ހިންގާ އިންޖީނުގޭގައި މިވަގުތު ހުރި 17 އިންޖީނުގެ ތެރެއިން މިވަގުތު މަސައްކަތް ކުރަނީ 13 އިންޖީނެއް ކަމާއި ހަތަރު އިންޖީނަކަށް މައްސަލަ ދިމާވެފައިވާއިރު، އޭގެތެރެއިން އެންމެ އިންޖީނެއް ފިޔަވައި ދެން ހުރި ތިން އިންޖީނު ހުރީ މާރާމާތު ނުކުރެވޭ ހާލަތުގައި ކަމަށް ފެނަކަ އައްޑޫ އޮފީހުގައި މަސައްކަތް ކުރާ ސީނިއާ މުވައްޒަފުން މައުލޫމާތު ދީފައިވާ ކަމަށެވެ.
އިންޖީނުތަކަށް މައްސަލަ ދިމާވާ މައިގަނޑު ސަބަބެއްގެ ގޮތުގައި މުވައްޒަފުން ފާހަގަކުރަނީ ސްޕެއާ ހޯދުމަށް ރިކުއެސްޓް ކުރާތާ ގިނަ ދުވަސްތަކެއް ފާއިތުވެގެންދާއިރު ވެސް ސްޕެއާތައް ނުލިބި އިންޖީނުތަކުގެ މެއިންޓެނަންސް އަދި މަރާމާތު މަސައްކަތް ނުކުރެވުން ކަމަށް އެ ސިޓީގައި އަޒާން ވިދާޅުވި އެވެ.
އަޒާން ވިދާޅުވީ އައްޑޫ ކަރަންޓުގެ މައްސަލައާ ގުޅޭގޮތުން ފެނަކައިގެ އިސްވެރިންނާއެކު ދާދިފަހުން ބޭއްވި ބައްދަލުވުމުގައި ކަރަންޓުގެ މައްސަލަ ހައްލުކުރަން ބޭނުންވާ ސްޕެއާތައް 7 ދުވަހުގެ ތެރޭގައި އައްޑޫ އަށް ފޮނުވާނެ ކަމަށް ފެނަކައިގެ މެނޭޖިން ޑިރެކްޓަރު ހިމެނޭ ގޮތަށް އެ ކުންފުނީގެ އިސްވެރިން ޔަގީންކަން ދިން ނަމަވެސް އޭގެ 12 ވަރަކަށް ދުވަސް ފަހުން އިއްޔެ އައްޑޫގައި މަސައްކަތް ކުރާ ފެނަކައިގެ މުވައްޒަފުންނާއި ބައްދަލުކޮށް މައުލޫމާތު އޮޅުން ފިލުވުމުން ކަށަވަރުވީ ފެނަކައިގެ އިސްވެރިން ވިދާޅުވި ގޮތަށް އެއްވެސް ސްޕެއާއެއް އައްޑު އަށް ފޮނުވާފައި ނުވާކަން ކަމަށެވެ.
އަދި ކުރިއަށް އޮތް ރޯދަ މަހު އައްޑޫގައި ކަރަންޓު ބޭނުންކުރާ މިންވަރު އިތުރުވާނެ ކަމަށް ފެނަކަ އައްޑޫ އޮފީހުގެ އިސްވެރިންނަށް ލަފާކުރެވޭއިރު، އިންޖީނުގޭގެ މިހާރުގެ ކެޕޭސިޓީ އިތުރު ހަތަރު މެގަވޯޓު އިތުރުނުކުރެވޭ ނަމަ ރޯދަ މަހުގެ ތެރޭގައި ވެސް އައްޑޫ އިން ކަރަންޓު ކެނޑޭ މައްސަލަ ހައްލުނުކުރެވޭ ކަމަށް ފެނަކަ އައްޑޫ އޮފީހުގެ ސީނިއާ މުވައްޒަފުން މައުލޫމާތު ދީފައިވާ ކަމަށްވެސް އަޒާން ވިދާޅުވި އެވެ.
މީގެ އިތުރުން ވެސް އިންޖީނުގޭގައި ހުރި އިންޖީނުތަކަށް ބޭނުންވާ ތެލާއި، ބޭނުންވާ ކޭބަލް އަދި ސްޕެއާތައް ހޯދުމަށް ރިކުއެސްޓް ކުރުމުން ގިނަ ދުވަސްތައް ފާއިތުވާއިރު ވެސް އެތަކެތި ނުލިބުމަކީ ބޮޑު ގޮންޖެހުމެއް ކަމަށްވެސް ފެނަކަ އައްޑޫ އޮފީހުގެ ސީނިއާ މުވައްޒަފުން މައުލޫމާތު ދީފައިވާ ކަމަށް އަޒާންގެ ސިޓީގައިވެ އެވެ.
އަޒާން ވަނީ ކަރަންޓު މައްސަލައަކީ އައްޑޫ ރައްޔިތުންނަށް ދިމާވެފައިވާ ބޮޑު ތަކުލީފަކަށް ވެފައިވާއިރު، ފެނަކައިގެ އިސްވެރިންގެ ފަރާތުން ފެންނަމުންދާ ފަރުވާ ކުޑަކަމާއި އިހުމާލުވުންތަކަށް ބަލާއިރު، ކަރަންޓުގެ މައްސަލަ ހައްލެއް ހޯދުމާ ދިމާލަށް ފެނަކައިން މަސައްކަތް ކުރާތަން ނުފެންނަ ކަމަށްވެސް ވިދާޅުވެފަ އެވެ.
"އައްޑޫގެ އިންޖީނުގޭގެ ހާލަތު ހުރިގޮތުން އައްޑޫ އިން ކަރަންޓު ނުކެނޑޭ ދުވަހެއް މަދެވެ. މިއީ އަޅުގަނޑު ނިސްބަތްވާ ހިތަދޫ މެދު ދާއިރާގެ ރައްޔިތުން، ޖުމްލަ ގޮތެއްގައި އައްޑޫގެ ރައްޔިތުންނާއި އަދި އަޅުގަނޑުގެ ވެސް ކަންބޮޑުވުމެކެވެ،" އަޒާންގެ ސިޓީގައިވެ އެވެ.
މި ސިޓީގައި ވަނީ ފެނަކައިގެ އިސްވެރިން އެސްއޯއީ ކޮމިޓީއަށް ހާޒިރުކޮށް، އައްޑޫ އިންޖީނުގެއަށް ބޭނުންވާ ސްޕެއާ އަދި އެހެނިހެން ސާމާނު ފޮނުވުމުގައި ލަސްވާ ސަބަބުތައް ސާފުކޮށްދިނުމަށް އެދިފަ އެވެ.
ކޮމިޓީއަށް ހާޒިރުކޮށްދޭން އެދުނު ބޭފުޅުންނަކީ:
* މުހައްމަދު ނަޖާހު: މެނޭޖިން ޑިރެކްޓަރު
* އަބްދުލް ވާހިދު: ކުރީގެ ޕްރޮކިއުމެންޓް ހެޑް
* މަރިޔަމް ޝަހުލާ: ޕްރޮކިއުމެންޓް ހެޑް
* އަބްދުﷲ ވަހީދު: ޗީފް ފައިނޭންޝިއަލް އޮފިސަރު
* މުހައްމަދު މަސްއޫދު: ކުރީގެ ޗީފް ފައިނޭންޝިއަލް އޮފިސަރު
* އަބްދުﷲ ނާޝިދު: ޗީފް ޓެކްނިކަލް އޮފިސަރު
އެ ބޭފުޅުން ކޮމިޓީއަށް ހާޒިރުވާއިރު، އައްޑޫގެ ކަރަންޓު މައްސަލައަށް ހައްލު ހޯދުމަށް ފެނަކައިން އެކުލަވާލައިފައިވާ ޓައިމްލައިނެއް ނުވަތަ ޕްލޭނެއް އޮތް ނަމަ އެ މައުލޫމާތު ހިއްސާކުރެވޭ ގޮތަށް ހާޒިރުކޮށް ދޭން އަޒާންގެ ސިޓީގައި އެދިފައިވެ އެވެ.