މިދިޔަ ހުކުރު ދުވަހު އައްޑޫ ސިޓީގެ ރަށްތަކަށް ކުރި ވިއްސާރައިގައި ގެއްލުން ލިބުނު އާއިލާތަކަށް އެހީވުމަށް ހިތަދޫ ނޫރުލް އިސްލާމް ޖަމިއްޔާ އާއި ޖަމިއްޔަތުލް ޢުލޫމް ގުޅިގެން ޙާއްސަ ފަންޑެއް ޤާއިމްކޮށްފިއެވެ.
ނޫރުލް އިސްލާމްގެ އޮފިޝަލަކު އައްޑޫލައިވް އަށް މައުލޫމާތު ދެމުން ބުނި ގޮތުގައި، އައްޑޫ ސިޓީ ކައުންސިލް އިދާރާގެ ފަރާތުން ވަރަށް ބޮޑު އެހީތެރިކަމެއް ލިބިގެން ޤާއިމް ކުރި "އައްޑޫ ރިލީފް ފަންޑަށް" ފައިސާ އާއި ތަކެތީގެ އެހީތެރިކަން ފޯރުކޮށްދިނުމުގެ ފުރުސަތު ހުޅުވާލެވިފައިވާ ކަމަށެވެ.
" އަޅުގަނޑުމެން މި ފަންޑަށް ލިބޭ ތަކެއްޗާއި އެހީއަށް އެދޭ ފަރާތްތަކަށް އެތަކެތި ހަވާލުކުރެވޭ ގޮތުގެ ތަފްސީލް ކަމާއި ބެހޭ އިދާރާތަކާއި ހިއްސާކުރެވެމުން ދާނަން. " ނޫރުލް އިސްލާމްގެ އޮފިޝަލް ވިދާޅުވިއެވެ.
"އައްޑޫ ރިލީފް ފަންޑަށް" އެހީތެރިކަން ފޯރުކޮށްދިނުމަށް ބޭނުންފުޅުވާ ފަރާތްތަކުން، 9902900 ،9853200 އަދި 7725899 ފޯނަށް ގުޅުއްވައިގެން ކުރިއަށް ގެންދިއުމަށް އެ ޖަމިއްޔާގެ ފަރާތުން އެދިލައްވައެވެ.
ނޫރުލް އިސްލާމް ޖަމިއްޔާގެ ފަރާތުން އިސްނަގައިގެން ކޮންމެ އަހަރެއްގެ ރަމަޟާން މަހު ކާބޯތަކެތީގެ އެހީތެރިކަން ފޯރުކޮށްދިނުމުގެ މަޝްރޫޢުއެއް ވެސް ކުރިއަށް ގެންދެއެވެ. މި މަޝްރޫޢުގެ ދަށުން ކާބޯތަކެތީގެ އެހީ ފޯރުކޮށްދެނީ ޕްރޮގްރާމަށް ނަންނޯޓު ކުރުމަށް ހުޅުވާލާ މުއްދަތުގައި ނަން ނޯޓްކޮށްފައިވާ ފަރާތްތަކަކީ ޙަޤީޤަތުގައިވެސް އެހީތެރިކަމަށް ބޭނުންވާފަދަ ޢާއިލާތަކެއްތޯ ބެލުމަށް ނޫރުލް އިސްލާމް ޖަމިއްޔާގެ ވަފްދުތައް އެޢާއިލާތަކަށް ޒިޔާރަތް ކުރުމަށް ފަހުގައި ކަން ފާހަގަ ކޮށްލެވެއެވެ.