އަންނަ އަހަރުން ފެށިގެން އަތޮޅު ތެރޭގެ ހުރިހާ ރަށެއްގައި ހުރި ޕްރީ ސްކޫލްތައް އެޑިއުކޭޝަން މިނިސްޓްރީގެ ދަށަށް ބަދަލުކުރަން ނިންމާފައިވާ ކަމަށް އެޑިއުކޭޝަން މިނިސްޓަރު އައިޝަތު ޝިހާމް މިއަދު ވިދާޅުވެއްޖެ އެވެ.
މިއަދު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި މިނިސްޓަރު ވިދާޅުވީ، އެގޮތަށް ނިންމާފައި ވަނީ ރަށްރަށުގައި ހިންގާ ޕްރީ ސްކޫލްތަކުން ނުކުންނަ ދަރިވަރުންނަކީ ސްކޫލް ފެށުމަށް އެންމެ އެކަށޭނަ ކުދިންނަށް ހެދުމަށް ކަމަށެވެ.
މިނިސްޓަރު ވިދާޅުވިގޮތުގައި އަތޮޅުތަކުގައި ހުންނަ ޕްރީ ސްކޫލްތައް އެ މިނިސްޓްރީގެ ސްކޫލްތަކުގެ ދަށުން ހިންގަން ބަދަލުކުރި ނަމަވެސް، މާލޭގައި ހުރި ޕްރީ ސްކޫލްތަކުގެ ހިންގުމަށް ބަދަލެއް ނާންނާނެ ކަމަށެވެ.
މިނިސްޓަރު ވިދާޅުވީ އެގޮތަށް ބަދަލުވުމާ އެކު، މިހާރު ދަރިވަރުން ސްކޫލްގައި ހޭދަކުރަމުންދާ 10 އަހަރުގެ ބަދަލުގައި ކުރިއަށް އޮތްތާގައި އެލްކޭޖީ އަދި ޔޫކޭޖީ ހިމަނައިގެން ކުދިން ސްކޫލްގައި ހޭދަކުރަމުންދާނީ 12 އަހަރު ކަމަށެވެ. އެ ތަންތަނުގައި އުޅޭ މުވައްޒަފުންނަކީ ކޮންޓްރެކްޓް އުސޫލުން ދެ އަހަރު ގެންގުޅުމަށް ފަހު، އިތުރު ތަމްރީނު ދީގެން ސިވިލްސާވެންޓުންނަށް ވެގެން ދާނެ ކަމަށެވެ.
"މީގައި ރައީސް ޔާމީންގެ އެންމެ ބޮޑު ވިސްނުންފުޅަކީ ގްރޭޑް އެކަކަށް ކުދިން ވަންނަ އިރު އެ ކުދިންނަކީ ހަމަ ރަނގަޅަށް އެކަށީގެންވާ ތައްޔާރީތައް ވެގެން އަންނަ ކުދިންނަށް ވުން،" މިނިސްޓަރު ވިދާޅުވި އެވެ.
އަތޮޅު ތަކުގެ އިތުރުން މާލޭގައި ހިންގާ އަވަށު މަދަރުސާތައް ވެސް އެޑިއުކޭޝަން މިނިސްޓްރީގެ ދަށަށް ބަދަލުކުރަން ވަނީ ނިންމާފަ އެވެ.