އެކަށީގެންވާ ރަނގަޅު ކަނޑު ދަތުރުފަތުރުގެ ނިޒާމެއް ނެތުމަކީ ރާއްޖޭގެ ދެމެހެއްޓެނިވި ތަރައްގީ އަށް އެޅިފައިވާ ހުރަހެއް ކަަމަށް އޭޝިއަން ޑިވެލޮޕްމެންޓް (އޭޑީބީ) ނެރުނު ރިޕޯޓަކުން ހާމަވެއްޖެއެވެ.
ހޮޓެލް ޖެންގައި މިއަދު އޮތް ރަސްމިއްޔާތެއްގައި ދިވެހިރާއްޖޭގެ ނައިބް ރައީސް އަޙްމަދް އަދީބު ނެރެދެއްވި 'އޯވާ ކަމިން ދަ ޗެލެންޖަސް އޮފް އަ ސްމޯލް އައިލެންޑް ސްޓޭޓް، ކަންޓްރީ ޑައިގްނޯސްޓިކް ސްޓަޑީ' ރިޕޯޓްގައި ރާއްޖޭގެ ދެމެހެއްޓެނިވި ތަރައްގީ އަށް ކުރިމަތިވެފައި ވަނީ މައިގަނޑު ހަތަރު ގޮންޖެހުމެއް ވަނީ ފާހަގަކޮށްފައެވެ.
އޭގެ ތެރޭގައި އެކަށީގެންވާ އަދި ގާބިލު ކަނޑުދަތުރު ފަތުރުގެ ނިޒާމެއް ނެތުމާއި ޕްރޮފެޝަނަލް މަސައްކަތްތެރިންނާއި ފުރިހަމަ ތަމްރީން ލިބުފައިވާ މަސައްކަތްތެރިން މަދުކަން ވެސް ފާހަގަކޮށްފައިވެއެވެ. މީގެ އިތުރުން ރާއްޖޭގެ ކުދި އަދި މެދު ފަންތީގެ ވިޔަފާރިތަަކަށް އެކަށީގެންވާ ގޮތުގައި ފައިނޭންސް ލިބޭނެ ގޮތެއް ނެތް ކަން ވެސް އެ ރިޕޯޓްގައި ވަނީ ފާހަގަކޮށްފައެވެ. ދިވެހިރާއްޖޭގެ ދަރަނި އިތުރުވަމުންދާކަން ވެސް ފާހަގަކޮށްފައިވާ މި ރިޕޯޓްގައި އިތުރަށް ފާހަގަކޮށްފައިވާ ކަންތައްތަކުގެ ތެރޭގައި އާމްދަނީ ތަފާތުތައް ރާއްޖޭގައި ބޮޑުކަަން ހިމެނެއެވެ.
އޭޑީބީގެ ރިޕޯޓްގައި ރަނގަޅު ދަތުރުފަތުރުގެ ނިޒާމެއް ނެތްކަން ފާހަގަކޮށްފައިވާއިރު، ދިވެހިރާއްޖޭގެ ގިނަ ރަށްރަށުގައި އެކަށީގެންވާ ދަތުރުފަތުރުގެ ނިޒާމެއް ޤާއިމްވެފައި ނެތުމުގެ ޝަކުވާ ގިނަ އަދަދެއްގެ ރައްޔިތުން ކުރަމުން ގެންދާކަން ފާހަގަކޮށްލެވެއެވެ. ސަރުކާރުގެ ފަރާތުން ބައެއް ރަށްރަށުގައި ދަތުރުފަތުރުގެ ނިޒާމް ޤާއިމްކުރުމުގެ އެއްބަސްވުންތަކުގައި ސޮއިކުރި ނަމަވެސް އަމަލީ ގޮތުން އެއްވެސް މަސައްކަތެއް އަދި ފެށިފައެއް ނުވެއެވެ.