މަރަދޫފޭދޫ ބޮޑުމަގުގައި ހުންނަ “ހައިސީޒަންމާޓް” ފިހާރައިގެ ބިއްލޫރިތައް ތަޅާލައިފިއެވެ.
އެފިހާރައިގައި މަސައްކަތް ކުރާ މުވައްޒަފަކު 'އައްޑޫލައިވް' އަށް މައުލޫމާތު ދެމުން ބުނިގޮތުގައި ރޭ ދަންވަރު ގާތްގަނޑަކަށް 2:30 ގައި އެފިހާރައިގެ ބިއްލޫރިގަނޑު ތަޅާލުމަށް ފަހު ފިހާރައަށް ވަންނަން އުޅުނު ވަގު ވަނީ ފިލާފައި ކަމަށެވެ.
ފިހާރައިގެ ބިއްލޫރިގަނޑު ތަޅާލި އަޑަށް މީހުން ނިކުތީމަ ވަގު ކަލޭގެ ފިލީ. އެއްވެސް އެއްޗެއް ނުނެގޭ. " އެ ފިހާރައިގައި މަސައްކަތް ކުރާ މުވައްޒަފަކު 'އައްޑޫލައިވް' އަށް މައުލޫމާތު ދެމުން ބުންޏެވެ.
މައުލޫމާތު ލިބިފައިވާ ގޮތުގައި 'ހައިސީޒަން މާޓް' ހުންނަ ގޭގެ ގޯތި ތެރޭގައި އަލަށް ހަދަމުން އަންނަ ގެއަަކަށް ވެސް މިދިޔަ ހަފްތާގައި މީހަކު ވަނީ ވަގަށް ވަދެ އެގެއިން ވައްކަންކޮށްފައެވެ. އެގެއިން ވައްކަން ކުރި މީހާ މިހާރުވަނީ ފުލުހުންގެ ބެލުމުގެ ދަށަށް ގެންގޮސް އެގެއިން އޭނާ ވަގަށް ނަގާފައިވާ ކަރަންޓް ސާމާނު ހޯދާފައެވެ.
'ހައިސީޒަން މާޓް' ގެ ބިއްލޫރި ތަޅާލައި އެފިހާރައިން ވައްކަން ކުރަން އުޅުނު މައްސަލަ ފުލުހުން މިހާރު ގެންދަނީ ތަހުޤީޤު ކުރަމުންނެވެ.
މިފަހަކަށް އައިސް އައްޑޫ ސިޓީގައި ވައްކަމުގެ މައްސަލަތައް އިތުރުވެފައިވާއިރު، ދާދި ފަހުން ސ.ގަމުގައި ހިންގާ ސުވެނިއާ ޝޮޕްތަކުން ވައްކަން ކުރި ބިދޭސީ އަކު ވެސް ވަނީ ފުލުހުންގެ ބެލުމުގެ ދަށަށް ގެންގޮސްފައެވެ.