ކެންސަރު ބައްޔަށް މަގުފަހިވާ އެންމެ ބޮޑު ސަބަބަކީ ދުންފަތުގެ އިސްތިއުމާލު ކުރުން އެކަމާ ދުރުވާން އަޒުމް ކަނޑައަޅަން ރައީސް ޑރ. މުހައްމަދު މުއިއްޒު އެދިވަޑައިގެންފި އެވެެ.
މިއަދު ފާހަގަކުރަމުން އަންނަ ދުނިޔޭގެ ކެންސަރު ދުވަހާ ގުޅިގެން ސޯޝަލް މީޑިއާގައި އާންމުކުރި މެސެޖެއްގައި އެ މަނިކުފާނު ވިދާޅުވީ ކެންސަރު ބަލި ޖެހުމަށް މެދުވެރިވާ އެންމެ ބޮޑު އެއް ސަބަބަކީ ދުންފަތުގެ އިސްތިޢުމާލު ކުރުމުން ކަމަށްވާތީ، ދުނިޔޭގެ ކެންސަރު ބަލީގެ ދުވަހުގައި އެ ނުބައި އާދައިން ދުރުވުމަށް ޢަޒުމް ކަނޑައަޅަަން ޖެހޭ ކަމަށެވެ.
ކެންސަރު ބަލި ޖެހުމަށް މެދުވެރިވާ އެންމެ ބޮޑު އެއް ސަބަބަކީ ދުންފަތުގެ އިސްތިޢުމާލު ކުރުމުން ކަމުގައިވާތީ، ދުނިޔޭގެ ކެންސަރު ބަލީގެ ދުވަހުގައި މި ނުބައި އާދައިން ދުރުވުމަށް ޢަޒުމް ކަނޑައަޅަމާތޯ! pic.twitter.com/dlLf48nuGS
— Dr Mohamed Muizzu (@MMuizzu) February 4, 2025
ރައީސް އެކަމަށް އެދިވަޑަތް އިރު، ދުންފަތާ ދެކޮޅަށް ސަރުކާރުން ވަނީ މި ފަހުން ހަރުކަށި ފިޔަވަޅުތަކެއް އަޅައިފަ އެވެ. އެގޮތުން ވޭޕް މަނާކުރުމާއި ސިނގިރެޓާއި ދުންފަތުގެ ބާވަތްތަކުން ނަގާ ޑިއުޓީ ބޮޑުކުރުން ހިމެނެ އެވެ.
ސަރުކާރުން ބުނެފައި ވަނީ މީގެ މައިގަނޑު މަގުސަދަކީ ދުންފަތާ ދުރުވެ، ދުޅަހެޔޮ ސިއްހަތަކަށް ހިތްވަރުން ދިނުން ކަމަށެވެ.
ދުނިޔޭގެ ކެންސަރު ދުވަސް މިއަދު ފާހަގަކުރާ އިރު، މިހާރު ރާއްޖޭގައި ގައިންގަޔަށް ނާރާ އެންމެ އާންމު އެއް ބައްޔަކީ ކެންސަރުކަން ފާހަގަކޮށްލެވެ އެވެ. ރާއްޖޭގައި މިހާރު ކެންސަރަށް ފަރުވާ ކުރާ މީހުންގެ އަދަދު 1،600 އިން މައްޗަށް އަރާފައިވާ ކަމަށް ހެލްތް ޕްރޮޓެކްޝަން އޭޖެންސީ (އެޗްޕީއޭ) ގެ ތަފާސްހިސާބުތަކުން ދައްކަ އެވެ.