ކުރީގެ ރައީސް މުހައްމަދު ނަޝީދަށް މިއަދު އޭޑީކޭ ހޮސްޕިޓަލްގައި ފަރުވާ ދީފި އެވެ.
މިއަދު 3:30 އެހާކަންހާއިރު ނަޝީދަށް އޭޑީކޭގައި ފަރުވާދިންކަން އެމަނިކުފާނުގެ ވަކީލުން ކަށަވަރު ކޮށްދެއްވަ އެވެ. ނަމަވެސް އޭގެ ތަފްސީލެއް ވަކީލުން އަދި ކަރެކްޝަނަލް ސާވިސް އިން ވެސް އަދި ހާމައެއް ނުކުރެ އެވެ.
ކްރިމިނަލް ކޯޓުގެ އިސް ގާޒީ އަބްދުﷲ މުހައްމަދު ބަންދުކުރި މައްސަލާގައި ޓެރަރިޒަމްގެ ކުށް ސާބިތުވެ 13 އަހަރުގެ ޖަލު ހުކުމެއް އިއްވާފައިވާ ނަޝީދު މިހާރު ހުންނެވީ ގޭބަންދުގަ އެވެ. އެމަނިކުފާނު ގޭބަންދަށް ބަދަލުކުރީ ސިއްހީ ކަމަކާ ގުޅިގެން ޑޮކްޓަރުންގެ ލަފާގެ މަތިންނެވެ.
ރައީސް ނަޝީދުގެ މައްޗަށް ދައުލަތުން އުފުލި ޓެރަރިޒަމްގެ ދައުވާ ސާބިތުވެ އެމަނިކުފާނު 13 އަހަރަށް ޖަލަށް ލުމަށް މިދިޔަ މާޗް މަހުގެ 13 ވަނަ ދުވަހު ހުކުމްކޮށްފައި ވަނިކޮށް، ދައުލަތުގެ ފަރާތުން ހައިކޯޓުގައި މިދިޔަ ބުރާސްފަތި ދުވަހު ވަނީ އިސްތިއުނާފުކޮށްފަ އެވެ.