އައްޑޫ ސިޓީ، ފޭދޫ ފުޓްބޯޅަ ދަނޑުގައި ލައިޓް ޖަހައި، ކަރަންޓް ފޯރުކޮށް ދޭނެ ފަރާތެއް ހޯދަން އައްޑޫ ސިޓީ ކައުންސިލުން އަނެއްކާ ވެސް އިއުލާންކޮށްފި އެވެ.
މި ފަހަރު ނެރުނު އިއުލާނުގައިވާ ގޮތުން މި މަސައްކަތްކޮށް ދޭން ޝައުގުވެރިވާ ފަރާތްތަކަށް ކުރިމަތިލުމުގެ ފުރުސަތު މި މަހުގެ 27 އާ ހަމައަށް ވަނީ ހުޅުވާލައިފަ އެވެ. މިކަމާ ބެހޭ ގޮތުން މައުލޫމާތު ދިނުން މި މަހުގެ 23 ވަނަ ދުވަހު ހެނދުނު 11:00 ގައި ކައުންސިލް އިދާރާގައި އޮންނާނެ އެވެ.
ފޭދޫ ދަނޑުގައި ޖަހަން ލައިޓްތައް ގެނެސްފައި ހުންނަތާ ދެ އަހަރެއްހާ ދުވަސްވެފައިވާ އިރު، އެ މަސައްކަތް ނުނިމި ދިގުލައިގެން ދާތީ ފޭދޫގެ ޒުވާނުން ދަނީ ކަންބޮޑުވުން ފާޅު ކުރަމުންނެވެ. މިދިޔަ އަހަރުގެ ފެބްރުއަރީ މަހުގެ ތެރޭގައި ގެނައި ލައިޓިން ސިސްޓަމްގެ އަގަކީ 1.2 މިލިއަން ރުފިޔާ އެވެ.