Last Updated: April 20, 11:51
Sunday, April 20, 2025
ޚަބަރު

މޯލްޑިވިއަނުން އިތުރު ވައިޑް ބޮޑީ ބޯޓެއް ހޯދަން އިއުލާންކޮށްފި

ގައުމީ އެއާލައިން، މޯލްޑިވިއަނުން ރާއްޖެ އިން ބޭރަށް ދަތުރުތައް ފުޅާކުރުމަށްޓަކައި އިތުރު ވައިޑް ބޮޑީ މަތިންދާބޯޓެއް ހޯދަން އިއުލާންކޮށްފި އެވެ.

މޯލްޑިވިއަން އޮޕަރޭޓްކުރާ އައިލޭންޑް އޭވިއޭޝަން ސާވިސެސް (އައިއޭއެސް) އިން ބުނީ ބޭނުން ވަނީ އެއާބަސް އޭ-330-220 މަރުކާގެ މަތިންދާބޯޓެއް ލީސް އުސޫލުން ހޯދަން ކަމަށެވެ. އެ ބޯޓު ކުއްޔަށް ނަގަން ބޭނުންވަނީ ފަސް އަހަރުގެ މުއްދަތަށް ކަމަށް ބުނެފައިވެ އެވެ.

އެހެންވެ އެފަދަ ބޯޓެއް ކުއްޔަށް ދޫކުރަން ބޭނުންވާ ފަރާތްތަކަށް ބީލަން ހުށަހެޅުމުގެ ފުރުސަތު އަންނަ މަހުގެ 7 ވަނަ ދުވަހުގެ ނިޔަލަށް ވަނީ ހުޅުވާލައިފަ އެވެ.

މޯލްޑިވިއަނުން ވަނީ މިދިޔަ މަހު ވެސް ވައިޑް ބޮޑީ މަތިންދާބޯޓެއް ގެނެސް އޮޕަރޭޓްކުރަން ފަށައި، ޗައިނާގެ ތިން ސިޓީއަކަށް ކޮންމެ ހަފުތާތަކު ވެސް ތިން ދަތުރު ބާއްވަމުންނެވެ. އެ ދަތުރު ބާއްވާނީ ރާއްޖޭގެ މައި އެއާޕޯޓް ކަމަށްވާ ވެލާނާ އިންޓަނޭޝަނަލް އެއާޕޯޓް (ވީއައިއޭ) އާއި ޗައިނާގެ ބެއިޖިން، ޗެންގްޑޫ އަދި ޝަންހާއީއާ ދެމެދު އެވެ.

ސަރުކާރުން ވަނީ މިއަހަރު އޮކްޓޯބަރުގައި އިތުރު ވައިޑް ބޮޑީ މަތިންދާބޯޓެއް ގެނެސް އޮޕަރޭޓް ކުރަން ނިންމާފައިވާކަން އިއުލާންކޮށްފަ އެވެ.