އައްޑޫ ސިޓީ، ހަންކެޑެ ބްރިޖްގެ ފެންސް ހަލާކުވުމުގެ ސަބަބުން އެކަމުގެ ޝަކުވާ ގިނަ ބަޔަކު ކުރަމުން ދަނިކޮށް އެކަމަށް ހައްލެއް ހޯދައިދިނުމުގެ ގޮތުން ހަންކެޑެ ބްރިޖްގެ ފެންސް ބަދަލުކުރުމުގެ މަސައްކަތް ކައުންސިލުގެ ފަރާތުން ބަޔަކާއި ހަވާލުކުރީ މިދިޔަ ޖެނުއަރީ މަހުގެ 22 ވަނަ ދުވަހުއެވެ.
ހަންކެޑެ ބްރިޖްގެ ފެންސް ބަދަލުކުރުމުގެ މަސައްކަތް ކޮށްދޭނެ ފަރާތެއް ހޯދުމަށް ކައުންސިލުން އިއުލާން ކުރުމާއި ގުޅިގެން ޝައުގުވެރިކަންފާޅުކޮށް ބީލަން ހުށަހެޅި ފަރާތްތަކުގެ ތެރެއިން، އެންމެ މަތީ މާކްސް ހޯދި ކްރިސްޓަލް ސޭންޑީ މޯލްޑިވްސް ޕްރައިވެޓް ލިމިޓެޑާއި ހަވާލުކޮށްފައިވަނީ 60 ދުވަހުގެ ތެރޭގައި އެ މަސައްކަތް ކޮށް ނިންމާ ގޮތަށެވެ.
ކައުންސިލާއި ކްރިސްޓަލް ސޭންޑީ މޯލްޑިވްސް ޕްރައިވެޓް ލިމިޓެޑާ ދެމެދު ސޮއިކުރެވުނު އެގްރީމެންޓްގައި ބުނާ 60 ދުވަހުގެ މުއްދަތު ފާއިތުވެގެން ގޮސްފައިވާއިރު، އެ އެގްރީމެންޓް ބާތިލްކުރިކަމެއް ނުވަތަ ނޫން ކަމެއް ވެސް ކައުންސިލުން މިހާތަނަށް ހާމަކޮށްފައެއް ނުވެއެވެ. އަދި އެ މަސައްކަތް ކޮށްދޭނެ ފަރާތެއް ހޯދުމަށް އިއުލާން ކޮށްފައި ނުވާކަން ވެސް ފާހަގަކޮށްލެވެއެވެ.
މިކަމާއި ގުޅޭގޮތުން 'އައްޑޫލައިވް' އިން ކުރި ސުވާލަކަށް ޖަވާބު ދެއްވަމުން އައްޑޫ ސިޓީ ކައުންސިލްގައި ހިތަދޫ ދެކުނު ދާއިރާ ތަމްސީލްކުރައްވާ، ކައުންސިލަރ މުޙައްމަދު ޔަސްރިފް ވިދާޅުވި ގޮތުގައި، ކުޑަ ދުވަސްކޮޅެއްގެ ތެރޭގައި ފެންސް ގެނެވޭނެ ކަމަށް ކްރިސްޓަލް ސޭންޑީ މޯލްޑިވްސް ޕްރައިވެޓް ލިމިޓެޑްގެ ފަރާތުން ކައުންސިލަށް އަންގާފައިވާ ކަމަށެވެ.
ނަމަވެސް ކްރިސްޓަލް ސޭންޑީ މޯލްޑިވްސް ޕްރައިވެޓް ލިމިޓެޑްގައި މަސައްކަތް ކުރައްވާ މުވައްޒަފަކު 'އައްޑޫލައިވް' އަށް މައުލޫމާތު ދެމުން ބުނިގޮތުގައި އެ ފެންސްގެ ހުރިހާ އެއްޗެއް މިހާރު ވަނީ ކައުންސިލާއި ހަވާލުކޮށްފައެވެ.
އައްޑޫ ސިޓީ ކައުންސިލުގެ ފަރާތުން އެކި މަސައްކަތްތައް ކުރުމަށް ކުންފުނިތަކާއި ހަވާލުކުރަމުން ގެންދާއިރު، އޭގެ ތެރެއިން ގިނަ މަސައްކަތްތަކެއް ފަށައިގަންނަތަން ނުފެންނަ ކަމަށް ބުނެ އައްޑޫގެ ގިނަ ބަޔަކު ކަންބޮޑުވުން ފާޅުކުރަމުން ގެންދާކަން ފާހަގަކޮށްލެވެއެވެ.