ސިވިލް ސާވެންޓުން އޮފީހަށް ސަލާމް ބުނާ ދުވަސްތަކަށް ސާވިސް އެލަވެންސުން އުނިކުރެވޭނެ ކަމަށް ބުނެފައިވާ ސިވިލް ސާވިސް ޤަވާއިދުގެ 160 ވަނަ މާއްދާ ވަޒީފާއާއި ބެހޭ ޤާނޫނާއި ޤާނޫނު އަސާސީ އާއި ޚިލާފު ކަމަށް ކަނޑައަޅައިދޭން ހައި ކޯޓަށް ހުށަހަޅައިފިއެވެ.
މި މައްސަލަ ހައި ކޯޓަށް ހުށަހެޅީ، އައްޑޫ ސިޓީ ކައުންސިލްގެ ލީގަލް އޮފިސަރ، ޙުސައިން ޙަބީބްއެވެ.
'އައްޑޫލައިވް' އާއި ވާހަކަ ދައްކަމުން ހަބީބް ވިދާޅުވި ގޮތުގައި، އެ މައްސަލަ ހައި ކޯޓަށް ހުށަހެޅީ ހުރިހާ ސިވިލް ސާވެންޓުންގެ ޙައްޤުގައި ކަމަށެވެ.
" މިމައްސަލަ އަޅުގަނޑު ކޯޓަށް ހުށަހެޅީ 160 ވަނަ މާއްދާގެ (ހ) ސަބަބުން ގިނަ ސިވިލް ސާވަންޓުން ތަކެއްގެ ޙައްޤު ގެއްލިގެން ދާތީ އެ ޙައްޤު ހޯދައި ދިނުމަށް" ޙަބީބު ވިދާޅުވިއެވެ.
ސިވިލް ސާވިސްގެ މުވައްޒަފުން އޮފީހަށް ސަލާމް ބުނާ ދުވަސް ތަކަށް ސާވިސް އެލަވަންސްގެ ގޮތުގައި ލިބޭ ފައިސާ އިން އެއްވެސް ވަރެއް އުނި ނުކުރެވޭނެ ކަމަށް ވަޒީފާ އާއި ބެހޭ ޓްރައިބިއުނަލުން ނިންމާފައިވި ނަމަވެސް މިހާރުވެސް ސަލާމް ބުނާ ދުވަސްތަކަށް ސާވިސް އެލަވެންސުން އުނިކުރަމުން ގެންދާކަން ފާހަގަކޮށްލެވެއެވެ.
ޓްރައިބިއުނަލް ގެ ނިންމުމަށް ފަހު ވެސް ސިވިލް ސާވެންޓުންގެ ސާވިސް އެލަވެންސުން އުނިކުރަމުން ދިޔަ ނަމަވެސް އޭޖީ އޮފީހުގައި މަސައްކަތްކުރާ ސިވިލް ސާވިސް މުވައްޒަފުން ސަލާމް ބުނާ ދުވަސްތަކަށް ސާވިސް އެލަވެންސުން އުނި ނުކުރުމަށް އެޓާނީ ޖެނެރަލް މުހައްމަދު އަނިލް ވަނީ އަންގާފައެވެ.
ސާވިސް އެލަވެންސްގެ މައްސަލައިގައި ވަޒީފާ އާއި ބެހޭ ޓްރައިބިއުނަލްގެ ނިންމުން ސިވިލް ސާވިސް ކޮމިޝަނުން ހައިކޯޓުގައި އިސްތިއުނާފް ކޮށްފައި ވާއިރު އެ މައްސަލައިގެ އަޑު އެހުމެއް އަދި ބާއްވާފައެއް ނުވެއެވެ.