އައްޑޫ ސިޓީ ހިތަދޫގައި ހުންނަ މޯލްޑިވްސް ޕޯސްޓްގެ އޮފީސް ފަޅާލައި އެތަނުން ވައްކަން ކޮށްފިއެވެ.
މައުލޫމާތު ލިބިފައިވާ ގޮތުގައި ޕޯސްޓް އޮފީސް ފަޅާލާފައިވާކަން އެނގުނީ، މިއަދު ހެނދުނު އެތަން ހުޅުވަން އޮފީހުގެ މުވައްޒަފުން ދިއުމުންނެވެ. ޕޯސްޓް އޮފީސް ފަޅާލުމަށްފަހު އެތަނުގައި ހުރި ބައެއް ޕާރުސަލްތައް ވަގުން ގެންގޮސްފައިވާ ކަމަށް ވެއެވެ.
މިކަމާއި ބެހޭގޮތުން މައުލޫމާތު އޮޅުން ފިލުވާލުމަށް، ހިތަދޫ ޕޯސްޓް އޮފީހަށް ގުޅުމުން މައުލޫމާތު ހިއްސާކުރެވޭނީ ހެޑް އޮފީހުގެ ހުއްދަ ލިބިގެން ކަމަށް ބުނެ މައުލޫމާތު ދިނުމަށް އެ އޮފީހުގެ މުވައްޒަފުން ވަނީ އިންކާރުކޮށްފައެވެ. ވައްކަން ކުރުމާއި ގުޅިގެން އެ އޮފީހުގެ ޚިދުމަތްތައް ވަގުތީ ގޮތުން މިހާރު ވަނީ މެދު ކަނޑާލާފައެވެ.
" ދިމާވި ކުޑަ މައްސަލައަކާއި ގުޅިގެން ކުޑަ އިރުކޮޅަކަށް ޚިދުމަތް މެދުކެނޑިފައިވާ ވާހަކަ މައުލޫމާތަށް ޓަކައި ދެންނެވީމެވެ." ޕޯސްޓް އޮފީހުގެ ބޭރުގައި ހަރުކޮށްފައިވާ ލިޔުމެއްގައި ވެއެވެ.
މި މައްސަލަ ހިތަދޫ ޕޮލިސް ސްޓޭޝަނުން ތަހުޤީޤްކުރަމުން އަންނަ އިރު މި ވައްކަމާއި ގުޅިގެން އަދި އެއްވެސް މީހަކު ފުލުހުންގެ ބެލުމުގެ ދަށަށް ގެންގޮސްފައި ނުވެއެވެ.
ހިތަދޫ ޕޯސްޓް އޮފީސް ފަޅާލައި ވައްކަން ކޮށްފައިވާއިރު ފާއިތުވި ހަފްތާއެއްހާ ދުވަހުގެ ތެރޭގައި އައްޑޫ ސިޓީގައި ވައްކަމުގެ މައްސަލަތައް އިތުރުވެފައިވާކަން ފާހަގަކޮށްލެވެއެވެ.