އައްޑޫ ސިޓީ މަރަދޫގައި ހުންނަ ތާރީޚީ ބިނާއެއް ކަމުގައިވާ ބޮޑަގެ މަރާމާތު ކުރުމުގެ މަސައްކަތް މަރަދޫފޭދޫ އިދްރީސް ކާޕެންޓްރީ އާ ހަވާލުކޮށްފި އެވެ.
މިއަދު ހަވީރު ބޮޑަގެ ކައިރީގައި ބޭއްވި ޙާއްސަ ރަސްމިއްޔާތެއްގައި އިނދްރީސް ކާޕެންޓްރީއާ އެއްބަސްވުން ހަވާލު ކުރެއްވީ އައްޑޫ މޭޔަރު އަބްދުﷲ ސޯދިގް (ސޯބެ) އާއި ޑެޕިއުޓީ މޭޔަރު އަބްދުﷲ ތޮއްޔިބެވެ. އިދްރީސް ކާޕެންޓްރީގެ ފަރާތުން އެއްބަސްވުމާ ހަވާލުވީ އެ ކުންފުނީގެ މެނޭޖިން ޑިރެކްޓަރު އިދްރީސް ގާސިމް އެވެ.
އެ ރަސްމިއްޔާތުގައި ވާހަކަދައްކަވަމުން އައްޑޫ ސިޓީގެ މޭޔަރ ސޯބެ ވިދާޅުވި ގޮތުގައި ކައުންސިލުގެ ބަޖެޓުން 500،000ރ. ޚަރަދުކޮށްގެން ކުރިއަށް ގެންދާ، ބޮޑޮގޭ މަރާމާތުކުރުމުގެ ފުރަތަމަ ފިޔަވަހީގެ މަސައްކަތް އިދްރީސް ކާޕެންޓްރީ އާއި ހަވާލުކޮށްފައި ވަނީ، 60 ދުވަހުގެ ތެރޭގައި ނިންމާ ގޮތަށެވެ. މިކަމަށް ހަރަދު ކުރުމަށް ނިންމާފައިވަނީ ކައުންސިލްގެ އާމްދަނީ ބަޖެޓުންނެވެ.
ފުރަތަމަ ފިޔަވަހީގައި ހިމެނެނީ އިމާރާތުގައި ހަލާކުވެފައި ހުރި ތަންތަން މަރާމާތުކުރުމާއި، ފުރާޅު ރަނގަޅުކޮށް، ދޮރުތައް އަރުވައި ކުލަ ލުން ފަދަ މަސައްކަތްތަކެވެ.
އައްޑޫ ސިޓީ ކައުންސިލުގެ ފަރާތުން އައްޑޫގެ ތާރީހު ދައްކުވައިދޭ ދާރުލް އާސަރާ އެކު ބޮޑަގޭގެ މަސައްކަތް ދެ ފިޔަވައްސަކަށް ބަހާލައިގެން ކުރިއަށް ގެންދާއިރު، ދެވަނަ ފޭހުގެ މަސައްކަތް ފަށާނީ އަންނަ އަހަރު އެވެ.
ބޮޑަގެ އަކީ ދެވަނަ ބޮޑު ހަނގުރާމައިގެ ދުވަސްވަރު އިނގިރޭސީންގެ މުވާސަލާތީ މަރުކަޒެއްގެ ގޮތުގައި ބޭނުންކުރުމަށް އިމާރާތް ކުރި ތަނެކެވެ. އޭގެ ފަހުން ތަފާތު އެކި ދުވަސްވަރު އެކިއެކި ކަންކަމަށް ބޭނުންކޮށްފައި ވާއިރު ސިއްހީ ހިދުމަތް ދޭ ތަނެއްގެ ގޮތުގަ އާއި މަރަދޫ މަކުތަބާއި އަތޮޅު ގެއާއި މަަރަދޫ ސްކޫލް ރަށު އޮފީސް ހިންގުމާއި ސިނަމާއެއްގެ ގޮތުގައި ވެސް އިމާރާތް ބޭނުންކޮށްފައިވެ އެވެ.