މާލޭގެ މާފަންނުގައި ފަޅަށް ހުރި ގެއެއްގައި މިއަދު ރޯވި ހާދިސާއާ ގުޅިގެން އެ ކައިރީގައި ހުރި ދެ ގެއަކުން 55 މީހަކަށް ވަގުތީ ބޯހިޔާވަހިކަން ފޯރުކޮށް ދީފި އެވެ.
ނެޝަނަލް ޑިޒާސްޓާ މެނޭޖްމަންޓް ސެންޓަރު (އެންޑީއެމްއޭ) އިން ބުނީ އެހީ ފޯރުކޮށް ދިން މީހުންގެ ތެރޭގައި 20 ބިދޭސީއަކު ވެސް ހިމެނޭ ކަމަށެވެ. ވަގުތީ ބޯހިޔާވަހިކަން ފޯރުކޮށް ދޭން ޖެހުނު ދެ ގޭބިސީ އަކީ އަލިފާނުގެ ހާދިސާގައި ފެންހޮޅިތަކަށް ގެއްލުންވި ގެތަކެކެވެ.
މިއަދު އަލިފާން ރޯވީ މ. ހައުސްޕްލާޒާގަ އެވެ.
މ.ހައުސް ޕްލާޒާގައި މިއަދު ހިނގި އަލިފާނުގެ ހާދިސާގެ ސަބަބުން ، ދެ ގެއެއްގެ މައި ފެންހޮޅިއަށް ލިބުނު ގެއްލުމާއި ގުޅިގެން އެކަން މަރާމާތުކުރެވެންދެން 2 ގެއަކުން 55 ފަރާތަކަށް(20 ބިދޭސީން ހިމެނޭހެން) ވަގުތީ ބޯހިޔާވަހިކަން ވަނީ ހަމަޖައްސައިދެވިފައި.
— NDMA Maldives (@NDMAmv) February 9, 2025
އެމްއެންޑީއެފުން ބުނީ އެ ހާދިސާގެ މައުލޫމާތު ހެނދުނު 06:35 ހާއިރު ލިބުމާ އެކު ފަޔާފައިޓަރުން އެ ސަރަހައްދަށް ގޮސް އަލިފާން ނިއްވުމުގެ މަސައްކަތްކޮށް، 07:47 ހާއިރު އަލިފާން އެއްކޮށް ނިއްވާލާފައިވާ ކަމަށެވެ.
އެމްއެންޑީއެފުން ބުނި ގޮތުގައި އެ ގޭގައި ރޯވީ ގޭގައި ހުރި ކުނިތަކެއްގައި ރޯވެގެންނެވެ.