Last Updated: April 4, 22:44
Friday, April 4, 2025
ޚަބަރު

ހިތަދޫގެ ބޮޑު ސަރަހައްދަކުން މިރޭ ކަރަންޓް ކެނޑިދާނެ

އައްޑޫ ސިޓީ ހިތަދޫގެ ބޮޑު ސަރަހައްދަކުން މިރޭ ކަރަންޓް ކެނޑުމަކީ އެކަށީގެންވާ ކަމެއް ކަމަށް ފެނަކަ އިން ބުނެފި އެވެ.

ފެނަކައިގެ ހިތަދޫ ބްރާންޗުން ބުނީ އިންޖީނަކަށް ދިމާވި މައްސަލައަކާއި ގުޅިގެން މިރޭ ހިތަދޫގެ ބޮޑު ސަރަހައްދަކުން ކަރަންޓުގެ ޙިދުމަތް މެދުކެނޑިގެން ދިއުމަކީ އެކަށީގެންވާ ކަމެއް ކަމަށެވެ.

އެގޮތުން ހިތަދޫގެ އެކި ސަރަހައްދުތަކުން މިހާރު އަންނަނީ އެއް ގަޑިއިރަށް ކަރަންޓް ކަނޑަމުންނެވެ.

އައްޑޫ ސިޓީގެ ކަރަންޓުގެ މައްސަލައިގައި ފެނަކައިގެ އިސްވެރިން ރައްޔިތުންގެ މަޖިލީހުގެ ސްޓޭޓް އޯންޑް އެންޓަޕްރައިޒެސް ކޮމިޓީ (އެސްއޯއީ) އަށް ހާޒިރުކޮށްދޭން ހިތަދޫ މެދު ދާއިރާގެ މެމްބަރު އަހުމަދު އަޒާން ދާދިފަހުން ވަނީ ހުށަހަޅުއްވާފަ އެވެ.

ރައްޔިތުންގެ މަޖިލީހުގެ ރައީސް ރައީސް އަބްދުއްރަހީމް އަބްދުﷲ އަށް އަޒާން ފޮނުއްވި ސިޓީގައި ވިދާޅުވީ އައްޑޫގައި ފެނަކައިން ހިންގާ އިންޖީނުގޭގައި މިވަގުތު ހުރި 17 އިންޖީނުގެ ތެރެއިން މިވަގުތު މަސައްކަތް ކުރަނީ 13 އިންޖީނެއް ކަމާއި ހަތަރު އިންޖީނަކަށް މައްސަލަ ދިމާވެފައިވާއިރު، އޭގެތެރެއިން އެންމެ އިންޖީނެއް ފިޔަވައި ދެން ހުރި ތިން އިންޖީނު ހުރީ މާރާމާތު ނުކުރެވޭ ހާލަތުގައި ކަމަށް ފެނަކަ އައްޑޫ އޮފީހުގައި މަސައްކަތް ކުރާ ސީނިއާ މުވައްޒަފުން މައުލޫމާތު ދީފައިވާ ކަމަށެވެ.

އިންޖީނުތަކަށް މައްސަލަ ދިމާވާ މައިގަނޑު ސަބަބެއްގެ ގޮތުގައި މުވައްޒަފުން ފާހަގަކުރަނީ ސްޕެއާ ހޯދުމަށް ރިކުއެސްޓް ކުރާތާ ގިނަ ދުވަސްތަކެއް ފާއިތުވެގެންދާއިރު ވެސް ސްޕެއާތައް ނުލިބި އިންޖީނުތަކުގެ މެއިންޓެނަންސް އަދި މަރާމާތު މަސައްކަތް ނުކުރެވުން ކަމަށް އެ ސިޓީގައި އަޒާން ވިދާޅުވި އެވެ.