އިދިކޮޅު އެމްޑީޕީ އާއި ސަރުކާރާއި ދެމެދު ކުރެވުނު މަޝްވަރާތަކުގައި، ކުރީގެ ރައީސް މުޙައްމަދު ނަޝީދު ފިޔަވައި އެހެން އެއްވެސް ސިޔާސީ ލީޑަރަކު ދޫކޮށްލުމަށް ވާހަކަ ދެކެވިފައި ނުވާކަން އިތުބާރު ހުރި ގޮތެއްގައި 'އައްޑޫލައިވް' އަށް އެނގިއްޖެއެވެ.
ސަރުކާރުގެ އިސް އޮފިޝަލަކު 'އައްޑޫލައިވް' އަށް މައުލޫމާތު ދެމުން ވިދާޅުވިގޮތުގައި، ސަރުކާރާއި އެކު އެމްޑީޕީ އިން ކުރި މަޝްވަރާތަކުގައި މައިގަނޑު ގޮތެއްގައި މަޝްވަރާކުރެވިފައިވަނީ ރައީސް ނަޝީދުގެ ބަންދަށް ލުޔެއް ހޯދުމާ ގުޅޭގޮތުން ކަމަށެވެ.
އެމްޑީޕީގެ ފަރާތުން މަޝްވަރާތަކުގައި ބައިވެރިވި ފަރާތްތަކުން ކުރީގެ ޑިފެންސް މިނިސްޓަރ ކާނަލް ނާޒިމާއި އަދާލަތު ޕާޓީގެ ރައީސް ޝެއިޚް އިމްރާން އަބްދުﷲގެ ދޫކޮށްލުމާއި ބެހޭގޮތުން ސަރުކާރާއި އެކު މަޝްވަރާކުރި ކަމަށާއި އެކަމަށް ބާރުއެޅުއްވިކަމަށް މީޑިޔާގައި ދައްކަވާފައިވާ ވާހަކަތައް ވެސް ސަރުކާރުގެ އޮފިޝަލް ވަނީ ދޮގުކޮށްފައެވެ. އޭނާ ވިދާޅުވި ގޮތުގައި، ސަރުކާރުގެ ފަރާތުން އެމްޑީޕީއާއި އެކު ދެކެވުނު ވާހަކަތަކުގައި، ސަރުކާރުން ހުށަހެޅި ހުރިހާ ހުށަހެޅުމަކަށް އެމްޑީޕީ އިން އެއްބަސްވެފައިވަނީ ރައީސް ނަޝީދު މިނިވަންކުރުމަށް ޝަރުތުކުރުމަށް ފަހުގައެވެ.
" ނައިބު ރައީސް އިމްޕީޗްކުރުމާއި، އަދީބު ނައިބު ރައީސް ކަމަށް ގެނައުމާއި އަދި ބޭރުގެ ފަރާތްތަކަށް ބިން މިލްކު ކުރެވޭ އިސްލާޙު ފާސްކުރުމަށް އެމްޑީޕީ އިން ވޯޓު ދިނީ ނަޝީދު މިނިވަން ކުރާނެ ކަމުގެ ޔަޤީންކަން ދިނުމުން. އެ ވާހަކަތަކުގައި އިމްރާނުއާއި ނާޒިމްގެ ވާހަކައެއް ނުދެކެވޭ. އެއީ އެބޭފުޅުންގެ ފަހަތުގައި ޕާލިމެންޓް މެމްބަރުންނެއް ނެތް. " އޮފިޝަލް ވިދާޅުވިއެވެ.
ސަރުކާރާއި އެކު އެމްޑީޕީ އިން ޑީލް ހެދި ކަމުގެ ތުހުމަތު ބައެއް ފަރާތްތަކުން ކޮށްފައިވާއިރު، އެމްޑީޕީގެ އިސްބޭފުޅުން ވިދާޅުވަނީ ސަރުކާރާއި އެކު ކުރި މަޝްވަރާތަކުގައި ބައެއް ކަންކަމުގައި ދެފަރާތުން ވެސް ދޫދީފައި ވާނެކަމަށާއި އެހެން ނަމަވެސް ޑީލެއް ހަދާފައި ނުވާނެކަމަށެވެ.
އެހެން ނަމަވެސް ރައީސް ނަޝީދު ގޭބަންދަށް ބަދަލުކުރުމާއި އެކު، ޖަލުގައި ބަންދުކުރެވިފައި ތިބި ސިޔާސީ ކުށްވެރިން ދޫކުރުމަށް އެމްޑީޕީގެ އިސްބޭފުޅުން މާބޮޑު އަހަންމިއްޔަތެއް ނުދެއްވާކަމަށް ބުނެ އެމްޑީޕީގެ ބައެއް މެންބަރުން ވެސް ވަނީ ފާހަގަކޮށްފައެވެ. އެމްޑީޕީއާއެކު ސަރުކާރުން ކުރެވުނު މަޝްވަރާތައް ކުރިއަށްގެންދިޔައީ ހަމައެކަނި ނަޝީދު މިނިވަންކުރުމަށް އިސްކަންދީގެންކަމަށް ސަރުކާރުގެ އޮފިޝަލަކު ވިދާޅުވެފައިވާއިރު، ޑޮކްޓަރުންގެ މެޑިކަލް ރިޕޯޓްތަކަށް ބެލުމަށްފަހު "ސްޓްރެސް ފްރީ" މާޙައުލެއްގައި ބެހެއްޓެވުމަށް ގޭބަންދަށް ބަދަލުކޮށްފައި ހުންނެވި ރައީސް ނަޝީދު ވަނީ ރޭގެ ވަގުތެއްގައި އަނެއްކާވެސް މާފުށީ ޖަލަށް ގެންދަވާފައެވެ.