ޓެރަރިޒަމްގެ ކުށް ސާބިތުވެ ކްރިމިނަލް ކޯޓުން އިއްވާފައިވާ 13 އަހަރުގެ ޖަލު ހުކުމެއް ތަންފީޒުކުރައްވަމުން ގެންދަވާ ކުރީގެ ރައީސް މުހައްމަދު ނަޝީދު ގޭ ބަންދުން އަނބުރާ ޖަލަށް ގެންގޮސްފިއެވެ.
މޯލްޑިވިސް ކަރެކްޝަނަލް ސާވިސްގެ އޮފިޝަލަކު 'އައްޑޫލައިވް އަށް މައުލޫމާތު ދެމުން ވިދާޅުވިގޮތުގައި ރައީސް ނަޝީދު އަނބުރާ މާފުށީ ޖަލަށް ބަދަލު ބަދަލުކޮށްފައިވަނީ ޑޮކްޓަރުގެ ރިޕޯޓްތައް ދިރާސާކުރުމަށް ފަހު މެޑިކަލް ބޯޑުން ދެއްވި ލަފާއާއި ގުޅިގެން ކަމަށެވެ.
ޑޮކްޓަރުންގެ ލަފާގެ މަތިން "ސްޓްރެސް ފްރީ އެންވަޔަރަންމެންޓެއްގައި" ބެހެއްޓުމަށް ރައީސް މުހައްމަދު ނަޝީދު ގޭ ބަންދަށް ބަދަލު ކޮށްފައިވަނީ މިދިޔަ ޖޫން މަހު 21 ވަނަ ދުވަހުއެވެ.
ރައީސް ނަޝީދު 13 އަހަރަށް ޖަލަށްލާފައި ވަނީ އެމަނިކުފާނު ރާއްޖޭގެ ރައީސުލްޖުމްހޫރިއްޔާ ކަމުގެ މަގާމާއި ސިފައިންގެ އެންމެ މަތީވެރިޔާގެ މަގާމުގައި ހުންނަވައި ކްރިމިނަލް ކޯޓުގެ އިސް ގާޒީ އަބްދުﷲ މުހައްމަދު ހައްޔަރުކުރުމަށް ސިފައިންނަށް އަމުރު ކުރެއްވި މައްސަލައިގައެވެ.
ރައީސް ނަޝީދު މިވަގުތު ދިރިއުޅުއްވާ، މ. ޔާގޫތުގެއަށް އެމަނިކުފާނު ބަލައި ކަރެކްޝަނަލް ސާވިސްގެ މުވައްޒަފުން ދިޔުމުން ރައީސް ނަޝީދުގެ ސަޕޯޓަރުންނާއި ފުލުހުންނާއި ދެމެދު ހަމަނުޖެހުން ހިނގާފައިވާކަން ފާހަގަކޮށްލެވެއެވެ.
އެގޮތުން ޔާގޫތުގޭ ކައިރިއަށް އެއްވި މީހުން އެސަރަހައްދުން ދުރުކުރުމަށް ކުރި މަސައްކަތުގައި ފުލުހުން ޕެޕަރ ސްޕްރޭ ބޭނުންކުރުމުގެ ސަބަބުން ބައެއް ނޫސްވެރިންނާއި އާންމުންނަށް ހޮސްޕިޓަލުގައި ވެސް ފަރުވާދީފައިވެއެވެ.