“މިނިވަން 50 ޗެމްޕިއަންޝިޕް” ފުޓްބޯޅަ މުބާރާތުގައި ވާދަ ކުރާ މަރަދޫފޭދޫގެ ޓީމަށް ރައްޔިތުންގެ މަޖިލީހުގެ އައްޑޫ މީދޫ ދާއިރާގެ މެމްބަރު ރޮޒައިނާ އާދަމްގެ ފަރާތުން 2،000ރ ގެ ފައިސާގެ އެެހީއެއް ވެދީފިއެވެ.
ސެޕްޓެމްބަރ މަހުގެ 15 ގައި ފަށާ މުބާރާތުގައި މަަރަދޫފޭދޫ ޓީމުން، އެ ދާއިރާގެ މެމްބަރުގެ އެހީއަކަށް އެދުމުން އެންމެ 2،000ރ. ދެެއްވުމުން ގިނަ ބައެއްގެ މަލާމާތާއި ފާޑު ކިއުންތައް ރޮޒެއިނާ އާދަމަށް އަމާޒުވެފައިވާއިރު، އިތުބާރު ހުރި ގޮތެއްގައި 'އައްޑޫލައިވް' އަށް އެނގިފައިވާ ގޮތުގައި މަރަދޫފޭދޫ ޒުވާނުން ރޮޒެއިނާގެ އަރިހުން އެދިފައިވަނީ އެރަށު ފުޓްބޯޅަ ދަނޑުގެ މައްސަލަ ހައްލުކޮށްދިނުމަށެވެ.
ރޮޒެއިނާއަށް ފާޑުކިޔާ ފަރާތްތަކުން ބުނާގޮތުގައި، ރައްޔިތުންގެ މަޖިލީހުގެ މެންބަރުކަން ލިބިވަޑައިގަތުމުން އެހީތެރިކަމަށް އެދޭ ކޮންމެ ބަޔަކީ ލާރި އަށް ސަލާންޖަހާ ބައެއްގެ ގޮތުގައި ރޮޒެއިނާއަށް ހީވަނީ ކަމަށެވެ.
ސޯޝަލް މީޑިއާގައި ރޮޒެއިނާ އަށް ގިނަ ބަޔަކު ފާޑުކިޔަމުން ގެންދާއިރު، އެއްބަޔަކު އޭނާއަށް ތާއީދުކޮށް ވެސް ވާހަކަދައްކަމުން ދާކަން ފާހަގަކޮށްލެވެއެވެ. އެމީހުން ބުނާގޮތުގައި ރޮޒެއިނާ ފިޔަވައި އެފަދަ އެހީއެއް ވެސް ވެދެއްވަން ކެރިވަޑައިގެންނެވި ބޭފުޅަކު ވެސް ނެތް ކަމަށެވެ.