ފުވައްމުލަކު މަގުހެދުމުގެ މަޝްރޫގެ ތެރެއިން 2.9 ކިލޯ މީޓަރުގެ މަގު ހެދުމުގެ މަސައްކަތް ހައުސިން މިނިސްޓްރީން (އެމްއާރުޑީސީ) މޯލްޑިވްސް ރޯޑް ޑިވެލޮޕްމަންޓް ކޯޕަރޭޝަނާއި ހަވާލުކޮށްފި އެވެ.
މިއަދު ހައުސިން މިނިސްޓްރީގައި ބޭއްވި ރަސްމިއްޔާތެއްގައި އެ އެއްބަސްވުމުގައި ސަރުކާރުގެ ފަރާތުން ސޮއިކުރެއްވީ ހައުސިން މިނިސްޓަރު ޑރ. މުހައްމަދު މުއިއްޒު އެވެ. އެމްއާރުޑީސީގެ ފަރާތުން ސޮއިކުރެއްވީ އެ ކޯޕަރޭޝަންގެ މެނޭޖިން ޑިރެކްޓަރު އިބްރާހިމް ނަޒީމު އެވެ.
މިނިސްޓަރު މުއިއްޒު ވިދާޅުވީ، އެ ޕްރޮޖެކްޓުގެ ދަށުން ހަދާ ބޮޑު މަގުގައި ތާރު އަޅައި މަގު ބައްތިތައް ޖަހާނެ ކަމަށާއި މަގުގެ ރައްކާތެރި ކަމަށް ކުރަން ޖެހޭ ހުރިހާ ކަމެއްވެސް ކުރާނެ ކަމަށެވެ. މިމަސައްކަތްތައް ކުރިއަށްދާނީ ފެނާއި ނަރުދަމާގެ މަސައްކަތް ކުރިއަށްދާ ގޮތަށް ބަލާފައި ކަމަށް މިނިސްޓަރު ވިދާޅުވި އެވެ. އަދި ރަށުގެ އިތުރު މަގުތައް ހެދުމުގެ މަޝްރޫއެއް ކުރިއަށް އޮތްތާގައި ފަށާނެ ކަމަށެވެ.
މުއިއްޒު އިތުރަށް ވިދާޅުވީ އެ މަޝްރޫގެ ސަބަބުން ފުވައްމުލަކުގެ ތަރައްގީއަށް އިތުރު ކުރިއެރުން ލިބިގެން ދާނެ ކަމަށާއި އެ ޕްރޮޖެކްޓް ކުރިއަށް ގެންދިއުމުގައި ޝާމިލުވި ހުރިހާ ފަރާތްތަކަށް ޝުކުރު އަދާކުރައްވާ ކަމަށެވެ.
އެމްއާރުޑީސީގެ އެމްޑީ ނަޒީމު ވިދާޅުވީ އެއް އަހަރަށް ވުރެ އަވަސް މުއްދަތެއްގައި އެ މަގުގެ މަސައްކަތް ނިންމާލާނެ ކަމަށެވެ. މި މަޝްރޫއަކީ ސަރުކާރުގެ ބަޖެޓުން ގާތްގަނޑަކަށް 33 މިލިއަން ރުފިޔާ ހަރަދުކޮށްގެން ހިންގާ މަޝްރޫއެކެވެ.