ރާއްޖޭގައި ހިންގަން ހުއްދަ ދީފައިވާ ކޯސްތަކާއި ޕްރޮގްރާމްތަކެއް ރާއްޖެއިން ބޭރުގައި ހިންގަމުންދާ ކަމަށް މޯލްޑިވްސް ކޮލިފިލޭޝަން އޮތޯރިޓީ އެމްކިއުއޭ) އިން ބުނެފި އެވެ.
އެތަނުން މިއަދު ނެރުނު ބަޔާނެއްގައި ބުނީ ހުއްދަ ނުހޯދައި ހިންގާ އެފަދަ ޕްރޮގްރާމްތަކުން ދޫކުރާ ސެޓްފިކެޓް ބަލައިނުގަންނާނެ ކަމަށެވެ.
އެމްކިއުއޭ އިން ބުނީ ރާއްޖޭގައި ހިންގަން ހުއްދަ ދީފައިވާ ޕްރޮގްރާމްތައް ބައެއް މަރުކަޒުތަކުން، ރާއްޖެއިން ބޭރުގައި އިޝްތިހާރުކޮށް އަދި ސެޓްފިކެޓު ދީފައިވާ ކަމަށް ބޭރުގެ ބައެއް އިދާރާތަކުން މައުލޫމާތު ދީފައިވާ ކަމަށެވެ. އަދި އެމްކިއުއޭއިން އެކްރެޑިޓުކޮށްފައިވާ ޕްރޮގްރާމްތައް ހިންގާފައި ވަނީ އެ އިދާރާއިން ގަބޫލުނުކުރާ ބޭރުގެ މަރުކަޒުތަކުގައި ކަމަށް ވެސް ބުންޏެވެ.
އެހެންވެ އެމްކިއުއޭގެ އެކްރެޑިޓޭޝަނާ ހިލާފަށް ހިންގާ ކޯސްތަކުން ދޭ ސެޓްފިކެޓުތައް ބަލައިނުގަންނާނެ ކަމަށާއި ޤަވައިދާ ޚިލާފަށް ސެޓްފިކެޓް ދިނުމުގެ ސަބަބުން ރާއްޖެ އާއި ރާއްޖެއިން ބޭރުގެ ދަރިވަރުންނަށް ގިނަ ގެއްލުންތަކާ ކުރިމަތިލާން ޖެހިފައިވާ ކަމަށެވެ.
އެމްކިއުއޭ އިން ބުނީ އެ ގެއްލުމުގެ ޒިންމާ އެތަނުން ނުނަގާނެ ކަމަށެވެ.
އެމްކިއުއޭ އިން ވަނީ ރާއްޖޭގެ މަތީ ތައުލީމުދޭ މަރުކަޒުތަކުން ޕްރޮގްރާމް އެކްރެޑިޓޭޝަން ދީފައިވާ ގޮތާ އެއްގޮތަށް ހިންގުމަށް މީގެ ކުރިން ވެސް ތަކުރާރުކޮށް އިލްތިމާސްކޮށްފަ އެވެ.