Last Updated: April 4, 22:44
Friday, April 4, 2025
ޚަބަރު

ގާނޫނީ ދާއިރާގެ ކޯސް ހިންގަނީ ޕީއެންސީ މެމްބަރުންނަށް އެކަނި

މީދޫ ދާއިރާގެ މެންބަރު އަބްދުއްރަހުމާން (އައްދު) - ފޮޓޯ: މަޖިލިސް

ޝަރީއަތާއި ގާނޫނުގެ ދާއިރާއިން މަތީ ތައުލީމު ފޯރުކޮށްދޭން ފެށި ޕްރޮގްރާމް ކުރިއަށް ގެންދަނީ، ރައްޔިތުންގެ މަޖިލީހުގެ ޕީއެންސީގެ މެމްބަރުންނަށް އެކަނި ކަމަށް، އައްޑޫމީދޫ ދާއިރާގެ މެންބަރު އަބްދުއްރަހްމާން ވިދާޅުވެއްޖެ އެވެ.

އިސްލާމިކް ޔުނިވަސިޓީން ރައްޔިތުންގެ މަޖިލީހާއި ގުޅިގެން ފަށާފައިވާ މި ޕްރޮގްރާމުގެ ދަށުން ހިންގުމަށް ހަމަޖެހިފައި ވަނީ އެޑްވާންސްޑް ސެޓްފިކެޓް އިން ޝަރީޢާ އެންޑް ލޯ ކޯހެކެވެ.

އެއް އަހަރު ދުވަހަށް ކިޔަވައިދޭ މި ކޯހުގައި މަޖިލީހުގެ 8 މެންބަރަކު ބައިވެރިވެވަޑައިގަންނަވަ އެވެ.

އެކްސްގައި ކުރެއްވި ޕޯސްޓެއްގައި އަބްދުއްރަހްމާން ވިދާޅުވީ މިއީ އެއްގޮތަކަށް ވެސް މަޖިލިސް ހުރިހާ މެންބަރުންނަށް ލިބުނު ފުރުސަތެއް ނޫން ކަމަށާއި މިއީ މަޖިލީހުގެ އެހެން މެމްބަރުން ކައިރި ހޭވެސް އަހާނުލާ ޕީއެންސީގެ މެމްބަރުންނަށް އެކަނި ހޯދައިދެވުނު ފުރުސަތެއް ކަމަށެވެ.

"ޕީއެންސީ ޕީޖީ މީޓިންއެއްގައި ނިންމެވި ނިންމުމެއް ކަމަށް އަޅުގަނޑަށް ފަހުން އެބޭފުޅުންގެ ތެރެއިން މައުލޫމާތު ލިބުނު،" އަބްދުއްރަހްމާން ވިދާޅުވި އެވެ.

މަޖިލީހުގެ ރައީސް ޢަބްދުއްރަޙީމް އަބްދުﷲ ވިދާޅުވީ މިފަދަ ކޯހެއް މަޖިލީހުގެ މެންބަރުންނަށް ހިންގަވައިދެއްވުމަށް އެދިވަޑައިގެންނެވި މައިގަނޑު ބޭނުމަކީ 20 ވަނަ ރައްޔިތުންގެ މަޖިލީހަކީ މަތީ ތަޢުލީމު ޙާޞިލުކޮށްފައިވާ ޢިލްމީގޮތުން ޤާބިލު މެންބަރުންތަކެއް ތިބި އަދި ޢިލްމީ މަސައްކަތްތަކެއް ކުރާ ނަމޫނާ މަޖިލީހެއްގެ ގޮތުގައި ހެއްދެވުމަށް ބޭނުންފުޅުވާތީ ކަމަށެވެ.

އަދި މިކަމަކީ 20 ވަނަ މަޖިލީސް އިންތިޚާބުވުމާއެކު ރައީސް ޑރ. މުހައްމަދު މުއިއްޒު ވެސް ވަރަށް ބޮޑަށް އެދިވަޑައިގެންނެވި ކަމެއް ކަމަށް އަބްދުއްރަހީމް ވިދާޅުވި އެވެ.

މެމްބަރުންނަށް ހިންގާ ކޯހަކީ މޯލްޑިވްސް ކޮލިފިކޭޝަން އޮތޯރިޓީ އާއި ރާއްޖޭގެ ބާ ކައުންސިލުން އެކަށައަޅުއްވާފައިވާ ކޮލިޓީ އެޝުއަރެންސް މިންގަނޑުތަކާ އެއްގޮތަށް ކުރިއަށް ގެންދަން ހަމަޖެހިފައިވާ ކޯހެކެވެ.