ޝަރީއަތާއި ގާނޫނުގެ ދާއިރާއިން ރައްޔިތުންގެ މަޖިލީހުގެ މެންބަރުންނަށް ހާއްސަކޮށްގެން ފެށި ކޯހަށް ފައިސާ ދައްކާނީ މެމްބަރުން އަމިއްލައަށް ކަމަށް އިނގުރައިދޫ ދާއިރާގެ މެމްބަރު އަދި ޕީއެންސީގެ ޕީޖީ ލީޑަރު އިބްރާހިމް ފަލާހު ވިދާޅުވެއްޖެ އެވެ.
އިސްލާމިކް ޔުނިވަސިޓީން ރައްޔިތުންގެ މަޖިލީހާއި ގުޅިގެން ފަށާފައިވާ މި ޕްރޮގްރާމުގެ ދަށުން ހިންގުމަށް ހަމަޖެހިފައި ވަނީ އެޑްވާންސްޑް ސެޓްފިކެޓް އިން ޝަރީޢާ އެންޑް ލޯ ކޯހެކެވެ.
އެއް އަހަރު ދުވަހަށް ކިޔަވައިދޭ މި ކޯހުގައި މަޖިލީހުގެ 8 މެންބަރަކު ބައިވެރިވެވަޑައިގަންނަވަ އެވެ.
އެކްސްގައި ކުރެއްވި ޕޯސްޓެއްގައި ފަލާހު ވިދާޅުވީ ކޮންމެ ކަމަކުން ވެސް މަޖިލިސް މެމްބަރުން ދެކެ ރުޅިއަރުވާލަން މަސައްކަތް ކުރާ ކަމަށާއި މި ކޯހަކީ މަޖިލީހުން ހަރަދުކޮށްގެން ހިންގާ ކޯހެއް ނޫން ކަމަށެވެ.
"މި ކޯސް މީ މާތްކަލާކޯ މަޖިލީހުން ހަރަދު ކޮށްގެން ހިންގާ ކޯހެއް ނޫން. މި ކޯހަށް ހިނގާ ހަރަދު އެ ބައިވެރިއަކު އަމިއްލަ އަށް ކުރަނީ،" ފަލާހު ވިދާޅުވި އެވެ.
ކޮއްމެ ކަމަކުންވެސް މަޖިލީސް މެމްބަރުން ދެކެ ރައްޔިތުން ރުޅި އަރުވާލަންވާނެ މިކޯސްމީ މާތްކަލާކޯ މަޖިލީހުން ހަރަދު ކޮށްގެން ހިންގާ ކޯހެއްނޫން މި ކޯހަށް ހިނގާ ހަރަދު އެ ބައިވެރި އަކު އަމިއްލަ އަށް ކުރަނީ . pic.twitter.com/xa8I3XUq6T
— Ibrahim Falah (@IbrahimFalahR) February 18, 2025
މަޖިލީހުގެ ރައީސް ޢަބްދުއްރަޙީމް އަބްދުﷲ ވިދާޅުވީ މިފަދަ ކޯހެއް މަޖިލީހުގެ މެންބަރުންނަށް ހިންގަވައިދެއްވުމަށް އެދިވަޑައިގެންނެވި މައިގަނޑު ބޭނުމަކީ 20 ވަނަ ރައްޔިތުންގެ މަޖިލީހަކީ މަތީ ތަޢުލީމު ޙާޞިލުކޮށްފައިވާ ޢިލްމީގޮތުން ޤާބިލު މެންބަރުންތަކެއް ތިބި އަދި ޢިލްމީ މަސައްކަތްތަކެއް ކުރާ ނަމޫނާ މަޖިލީހެއްގެ ގޮތުގައި ހެއްދެވުމަށް ބޭނުންފުޅުވާތީ ކަމަށެވެ.
އަދި މިކަމަކީ 20 ވަނަ މަޖިލީސް އިންތިޚާބުވުމާއެކު ރައީސް ޑރ. މުހައްމަދު މުއިއްޒު ވެސް ވަރަށް ބޮޑަށް އެދިވަޑައިގެންނެވި ކަމެއް ކަމަށް އަބްދުއްރަހީމް ވިދާޅުވި އެވެ.
މެމްބަރުންނަށް ހިންގާ ކޯހަކީ މޯލްޑިވްސް ކޮލިފިކޭޝަން އޮތޯރިޓީ އާއި ރާއްޖޭގެ ބާ ކައުންސިލުން އެކަށައަޅުއްވާފައިވާ ކޮލިޓީ އެޝުއަރެންސް މިންގަނޑުތަކާ އެއްގޮތަށް ކުރިއަށް ގެންދަން ހަމަޖެހިފައިވާ ކޯހެކެވެ.