ހަކުރުބަލީގެ މީހުން ބޭނުންކުރާ އިންސިއުލިން އައްޑޫން ނުލިބޭކަމުގެ ޝަކުވާތައް ބޮޑުވެއްޖެ އެވެ.
އެ ބޭނުން ކުރަން ޖެހިފައިވާ ބައެއް މީހުން މި ވާހަކަ ސޯޝަލް މީޑިއާގައި ވެސް ހިއްސާކޮށްފައިވެ އެވެ. އެގޮތުން ބައެއް މީހުން ބުނީ އައްޑޫގެ އެއްވެސް ފާމަސީއަކުން އިންސިއުލިން ލިބެން ނެތް ކަމަށެވެ. އެގޮތުން އައްޑޫގެ ހުރިހާ އަވަށެއްގެ ފާމަސީތަކަށް ގޮސްގެން ވެސް އިންސިއުލިން ލިބޭނެ ގޮތް ނުވި ކަމަށް މީހަކު ބުނެފައިވެ އެވެ.
އެ މީހާ ބުނި ގޮތުގައި ފާއިތުވި ނުވަ މަހުގެ ތެރޭގައި މި ތަކުލީފު އުފުލަން ޖެހި، އިންސިއުލިން ހޯދަން ޖެހިފައި ވަނީ މާލެއިންނެވެ. ނަމަވެސް އިންސިއުލިން އަކީ ހަމަ ކުއްލި ހާލަތެއްގައި ވެސް ބޭނުން ކުރަން ޖެހިދާނެ އެއްޗަކަށްޗާތީ އައްޑޫން އެ ލިބެން ނެތުމަކީ އެތައް ބަޔަކު އުފުލަން ޖެހިފައިވާ ވަރަށް ތަކުލީފެއް ކަމަށް ބައެއް މީހުން ބުނެފައިވެ އެވެ.
މިކަން މިހެން އޮއްވައި ސަރުކާރުން މިހާރު އާ ބްރޭންޑެއްގެ އިންސިއުލިން ރާއްޖެ އަށް ތައާރަފު ކުރަން އުޅޭ ކަމަށެވެ. އަދި އާސަންދަ މެދުވެރިކޮށް އިންސިއުލިން ހޯދަން ބޭނުންވާ ނަމަ އެ ބްރޭންޑްގެ އިންސިއުލިން އަށް ބަދަލުވާން މަޖުބޫރުވާނެ ކަމަށް ވެސް ބައެއް މީހުން ބުންޏެވެ.
އެހެންވެެއްޖެ ނަމަ މިހާރު ރާއްޖޭގައި ލިބެން ހުރި އެހެން ބްރޭންޑްތަކުގެ އިންސިއުލިން އާސަންދައިގެ ދަށުން ނުލިބި، އެ އިންސިއުލިން ބޭނުން ކުރަން ބޭނުންވާ ނަމަ އަމިއްލަ ޖީބުން ބޮޑު ހޭދައެއް ކުރަން ޖެހިދާނެކަމުގެ ކަންބޮޑުވުން ވެސް ބައެެއް މީހުން ފާޅުކޮށްފައިވެ އެވެ.
އިންސިއުލިން ބޭނުން ކުރަން ޖެހޭ ވަރަށް ގިނަ ބަޔަކަށް އެކަށީގެންވާ ފަރުވާ ވެސް އައްޑޫން ނުލިބޭ ޝަކުވާތައް ގިނަ ބަޔަކު އަންނަނީ ކުރަމުންނެވެ.