ދިވެހިރާއްޖޭގެ ހައުސިން މިނިސްޓަރ ކަމުގައި ހުންނެވި ޑރ. މުޙައްމަދު މުޢިއްޒަށް،
އާދޭހާއި އެކު ދަންނަވަމެވެ.
އަޅުގަނޑުގެ ހިތުގައި އުފެދިފައިވާ ޝަކުވާތައް މަނިކުފާނައި ހިއްސާ މިކުރަނީ މަނިކުފާނަކީ ދިވެހިރާއްޖޭގެ އެންމެހާ ރައްޔިތުންގެ ބޯހިޔާވަހި ކަމާއި އިންފްރާސްޓަރަކްޗާގެ ކަންތަކާއި ހަވާލުވެ ހުންނެވި މިނިސްޓަރަށް ވީމައެވެ. އަދި ރާއްޖޭގެ ހުރިހާ ރަށްތަކެއްގެ އިންފްރާސްޓަރަކްޗަރާއި ގުޅުން ހުރި އެންމެހައި ކަންތައް ވިލަރެސް ކުރެއްވުމުގެ ޒިންމާ އުފުއްލަވަން ހުންނެވި ބޭފުޅަކީ ވެސް ހަމަ ތިޔަ މިނިސްޓަރ ކަމަށް ވީމައެވެ.
އިއްޒަތްތެރި މިނިސްޓަރ އެވެ. މަނިކުފާނުގެ މިނިސްޓަރ ކަމުގައި ވަރަށް ރަނގަޅު ކަންތައްތަކެއް ދިވެހި ރައްޔިތުންގެ ޙައްޤުގައި ކޮށްދެއްވާފައިވާ ކަމަށް އަޅުގަނޑު ޤަބޫލުކުރަމެވެ. މަނިކުފާނުގެ ބުރަ މަސައްކަތްޕުޅުގެ އަގު ފަހަރެއްގައި ދިވެހި ރައްޔިތުންނަށް ވަޒަން ކުރެވިފައި ނުވުމަކީ ވެސް އެކަށީގެންވާ ކަމެކެވެ. ދިވެހިރާއްޖެ ފަދަ ޖަޒީރާ ޤައުމެއްގެ ހުރިހާ ރަށްތަކެއްގައި އެއް ފެންވަރެއްގައި ހުރިހާ ޚިދުމަތްތަކެއް ޤާއިމް ކުރުމަކީ އެހާ ފަސޭހަކަމެއް ނޫންކަން އަޅުގަނޑު ވެސް ޤަބޫލުކުރަމެވެ.
ނަމަވެސް އަޅުގަނޑުމެންގެ އާބާދީގެ ބޮޑު އިންސައްތައެއް ދިރިއުޅެމުން ގެންދާ ފުރަ މާލޭގައި ޚިދުމަތްތައް އެކަށީގެންވާ ގޮތެއްގައި ޤާއިމްވެފައި މަނިކުފާނު ވިދާޅުވާ ފަދައިން "ވަރަށް ވެސް ބޭނުންތެރިކަމެކެވެ". ރައްޔިތުންނަށް ރައްކާތެރިކަމާއި އެކު މަގުތަކުގައި ހިނގާ ބިނގާ އުޅެވޭނެ ގޮތްތަކެއް ހަމަޖެއްސުމަކީ މަނިކުފާނުގެ ޒިންމާ ތަކުގެ ތެރޭގައި ހިމެނޭ ކަމެކެވެ.
އަޅުގަނޑު އެއްވެސް ޙާލެއްގައި މަނިކުފާނުގެ ބޮލުގައި އިލްޒާމެއް އަޅުވައި މަނިކުފާނު ބަދުނާމު ކުރަން ބޭނުން ވަނީ އެއް ނޫނެވެ. އިއްޔެ ރޭ މާލޭގައި ހިނގި ނުރައްކާތެރި ހާދިސާއެއްގައި، އަޅުގަނޑު އެ ރަށަކަށް ނިސްބަތްވީތީ ފަޚުރުވެރިވާ ސ.ހިތަދޫގެ ޒުވާނަކު މި ދުނިޔެއާއި ވަކިވެގެން ދިޔުމަކީ އަޅުގަނޑަށް ލިބުނު ވަރަށް ފުން ހިތާމައެކެވެ. އެޒުވާނާގެ އާއިލާ އާއި އަދި މުޅި ދިވެހި ޤައުމަށް ވެސް ލިބިގެން ދިޔައީ ފޫނުބެއްދޭ ވަރުގެ ބޮޑު ގެއްލުމުކެވެ.
ކޮންމެ ފުރާނައަކީ ވެސް އަގުހުރި ފުރާނައަކެވެ. ހަމައެހެންމެ ކޮންމެ ފުރާނައެއް ވެސް އެ ފުރާނައަކަށް ވެސް ކަނޑައެޅިފައިވާ ވަގުތު ޖެހުމާއި އެކު ދުނިޔެއާ އަލްވަދާޢު ކިޔާނެއެވެ. މުޢިއްޒުގެ ބޮލުގައި އަދި ހައުސިން މިނިސްޓްރީގެ މުވައްޒަފެއްގެ ބޮލުގައި އިލްޒާމެއް އެޅުވުމަކަށް އަޅުގަނޑު ބޭނުމެއް ނުވެއެވެ. އަދި ކޮންޓެއިނާރ ލޮރީ ދުއްވަން އިން މީހާގެ ބޮލުގައި ބަދުނާމެއް އަޅުވާކަށް ވެސް އަޅުގަނޑު ބޭނުމެއް ނޫނެވެ.
ޢިއްޒަތްތެރި މިނިސްޓަރ އެވެ. އަޅުގަނޑުމެންނާއި ވަކިވެގެން ދިޔަ ޒުވާނާގެ ޖަނާޒާގެ ކަންތައް ނުނިމެނީސް މަނިކުފާނު އިސްކަން ދެއްވީ ނޫސް ބަޔާން ނެރެގެން މަނިކުފާނުގެ ކުށެއް ނެތްކަން ސާބިތުކޮށްދެއްވަން ނޫންތޯއެވެ.އެކަމާއި މެދު އަޅުގަނޑު ލަދުވެތިވަމެވެ. ހިތާމަކުރަމެވެ. އަޅުގަނޑު އުއްމީދުކުރީ އެފަދަ ހިތާމަވެރި ވަގުތެއްގައި މަނިކުފާނު އަށް ވެސް މުހިއްމު ވާނީ ހިތާމައާއި ހިތްދަތިކަން ލިބުނު އާއިލާގެ ހިތާމަ ލުއިކޮށްދެވޭތޯ މަސައްކަތް ކުރުން ކަމަށެވެ.
އަޅުގަނޑު އާދޭހާއި އެކު މަނިކުފާނަށް ދަންނަވަން ބޭނުންވާ ވާހަކައެއް އެބައޮތެވެ. މާލޭގެ މަގުތަކުގައި، އަދި ރާއްޖޭގެ އެހެނިހެން މަގުތަކަކީ ވެސް އެންމެންނަށް ރައްކާތެރި ތަންތަން ކަމުގައި ހެދުމަށް މަސައްކަތްޕުޅު ކޮށް ދެއްވާށެވެ. ޒިންމާއިން ރެކިވަޑައިގަތުމުގެ ބަދަލުގައި އަޅުގަނޑުމެން ހުރިހާ ރައްޔިތުންގެ ސަލާމަތާއި ރައްކާތެރިކަމަށް ޓަކައި މަސައްކަތް ކޮށްދެއްވާށެވެ.
މަނިކުފާނާއި ދިވެހިރާއްޖޭގެ ވެރިކަމުގެ އިސް މަޤާމުތަކުގައި ތިއްބެވި ބޭފުޅުންނަށް މިއަދު އަޅުގަނޑުމެން މިކުރާ ހިތާމަ ތަސައްވަރުކޮށް ނުލެވޭކަން އަޅުގަނޑަށް އެނގެއެވެ. އެކަމަކު އެކަމާއި މެދު އަޅުގަނޑުގެ ޝަކުވާއެއް ނެތެވެ. އަދި މަނިކުފާނު ނުވަތަ އެހެން އެއްވެސް ބޭފުޅަކާއި މެދުވެސް ހިތްހަމަނުޖެހުމެއް ނުބާއްވާނަމެވެ.
އެހެން ނަމަވެސް މިފަދަ ހިތާމަވެރި ހާދިސާތައް ހިނގުމަށް މެދުވެރިނުވާނެ ފަދަ ގޮތްތަކެއް ހަމަޖައްސައި ދެއްވުން އެދި އާދޭހާއި އެކު ދަންނަވަމެވެ .މިއަދު ވެރިކަމުގެ އާރާއި ބާރުގައި ތިއްބަވައިގެން އެކަން ކުރެއްވެން އޮތީ ހަމަ ތިބޭފުޅުންނަށެވެ. އާދޭސް ދަންނަވަމެވެ. އިތުރުފުޅު ހައްދަވާފައި ނޫސް ބަޔާން ނެރުއްވުމުގެ ބަދަލުގައި އިޚްލާސްތެރިކަމާއި އެކު އަޅުގަނޑުމެން ހުރިހާ ރައްޔިތުންނަށްޓަކައި މަސައްކަތް ކޮށްދެއްވާށެވެ.