ހިތާމަވެރި ޙާދިސާތަކުގެ ދަނޑިވަޅުގައި އެންމެ ބޮޑަށް އިސްކުރަންޖެހޭ އެއްކަމަކީ ކެތްތެރިކަމެވެ. އަދި ހިތާމައާއި ކުރިމަތިވެގެން އުޅޭ އާއިލާ ނުވަތަ ބަޔަކަށް ވެވޭނެ އެންމެ ބޮޑު އެހީތެރިކަމަކީ އެމީހުންގެ ހިތާމަތަކަށް ލުޔެއް ލިއްބައިދޭތޯ މަސައްކަތް ކުރުމެވެ. އިސްލާމްދީން ވެސް އަޅުގަނޑުމެންނަށް ބާރު އަޅާފައިވަނީ ހިތާމަތަކާއި މުސީބާތުގެ ވަގުތުގައި އެހެން މީހުންގެ ހިތާމަތަކަށް ލުޔެއް ލިއްބައިދޭތޯ މަސައްކަތް ކުރުމެވެ.
އެހެން ނަމަވެސް ހިތާމައަކީ އަޅުގަނޑުމެންގެ ދިވެހި މުޖްތަމަޢުގައި އެކަން އެގޮތަށް ނުހިނގާ ކަމެވެ. ގިނަ ފަހަރަށް ފެންނަމުން ދަނީ މުސީބާތުގެ ވަގުތުގައި ވެސް އަމިއްލަ ފައިދާ އާއި ލާބައަށްޓަކައި މަސައްކަތް ކުރަމުންދާ ތަނެވެ. ނުވަތަ ޒިންމާ ނަގާނެ ފަރާތެއް ނެތިގެން ރައްޔިތުން ގޮތް ހުސްވެގެން ދެކޮޅަށް ދުވަން ޖެހިފައިވާ މަންޒަރެވެ. ތިމާގެ އަޚާއަށް ނުވަތަ އުޚްތާއަށް ކުރިމަތިވެފައިވާ ހިތާމަވެރި ދަނޑިވަޅުގައި ތިމާގެ ޢަމަލުތައް ބެހެއްޓޭ ގޮތަކުން އެމީހުންނަށް ކިތަންމެ އަސަރެއް ކުރި ކަމުގައި ވިޔަސް ބައެއް މީހުންނަށް އެއީ މާބޮޑު ކަމެއް ނޫނެވެ.
ދައުލަތުގެ މުއައްސަސާތަކުން ބޭނުންވަނީ ޒިންމާއިން ރެކެން
ދިވެހިރާއްޖޭގައި ފަހުގެ ތާރީޚުގައި ހިނގާފައިވާ ހިތާމަވެރި ހާދިސާތަކަށް ބަލާލުމުން ވެސް ފެންނަނީ ދައުލަތުގެ މުއައްސަސާތަކުން، ކުޑަކުދިންގެ ޙައްޤުގައި ރައްކާތެރިކަމުގެ ފިޔަވަޅު އެޅުއްވުމުގެ ބަދަލުގައި، ގެންދަނީ އެ މުއައްސަސާގެ ކުށެއް ނެތްކަން ސާބިތުކޮށްދިނުމުގެ މަސައްކަތް ކުރައްވަމުންނެވެ. އެގޮތުން ވ.ރަކީދޫގައި އިހާނެތިގޮތަކަށް މަރާލެވުނު ތުއްތު ކުއްޖާގެ މަރުގެ މައްސަލައިގައި އެންމެ ފުރަތަމަ ދުވަހުން ފެށިގެން މިއަދާ ހަމައަށް ވެސް މިނިސްޓްރީ އޮފް ޖެންޑަރ އެންޑް ލޯގެ ފަރާތުން ކުރައްވާ މަސައްކަތަކީ އެބޭފުޅުންގެ އިހްމާލެއް އެކަމުގައި ނެތްކަން ސާބިތުކޮށްދިނުމުގެ މަސައްކަތެވެ. ކުޑަކުދިންނަށް ގޯނާ ކުރުން އިތުރުވެގެން ދާއިރު ރައްކާތެރިކަމުގެ ގޮތުން އެކަށީގެންވާ ފިޔަވަޅުތައް އެޅުމަށް ވަނީ ނުކުޅެދިފައެވެ.
2009 ވަނަ އަހަރުން ފެށިގެން ޢަމަލް ކުރަން ފަށާފައިވާ ‘ ކުޑަކުދިންނަށް ޖިންސީ ގޯނާކުރާ މީހުންނާމެދު ޚާއްޞަ އުސޫލުތަކަކަށް ޢަމަލުކުރުމުގެ ޤާނޫނު’ ގެ 57 ވަނަ މާއްދާގެ ދަށުން ކުޑަކުދިންނަށް ޖިންސީ ގޯނާ ކުރާ މީހުންގެ މަޢުލޫމާތު ފަސޭހައިން ބެލޭނެ ގޮތަކަށް އިންޓަނެޓް ވެބްސައިޓެއްގައި ބެހެއްޓުމަކީ، ކުޑަކުދިންގެ ރައްކާތެރިކަމަށް މަސައްކަތް ކުރާ ދަޢުލަތުގެ މުއައްސަސާގެ (މިނިސްޓްރީ އޮފް ޖެންޑާ އެންޑް ލޯ) ޒިންމާއެއް ކަމުގައި ވީ ނަމަވެސް އެ ޒިންމާ އަދާކުރައްވާ ތަނެއް ނުފެނެއެވެ.
މިދިޔަ ހޮނިހިރު ދުވަހުގެ ރޭ ހިނގި ހިތާމަވެރި ހާދިސާގައި މަގުމަތީގައި ބަހައްޓާފައި ހުރި ހޮޅިދަނޑިއެއް ވެއްޓި ޒުވާނަކު ނިޔާވުމާއި ގުޅިގެން ހައުސިން މިނިސްޓްރީގެ ފަރާތުން ވެސް ފެނިފައި ވަނީ އެ މިނިސްޓްރީގެ ކުށެއް ނެތްކަން ސާބިތުކޮށް ދިނުމުގެ މަސައްކަތް ކުރެއްވި ތަނެވެ. ދަންވަރު ގަޑީގައި މީޑިއާތަކުގެ އޮފީސްތަކަށް، ނޫސް ބަޔާން ހިފައިގެން އެ މިނިސްޓްރީގެ މުވައްޒަފުން ގޮސްފައިވެއެވެ. ނޫސް ބަޔާނުގައި ހައުސިން މިނިސްޓްރީގެ ފަރާތުން ބުނެފައިވާ ގޮތުގައި، އެ ހޮޅިދަނޑި ބެހެއްޓިފައިވަނީ ރައްކާތެރިކަން ކަށަވަރުކުރުމަށް ފަހު ކަމަށާއި، ހޮޅިދަނޑި ބަހައްޓާފައި ވަނީ ބިމަށް ޖަހައި މައުންޓްކޮށްފައި ކަމަށެވެ. ނަމަވެސް ހައުސިން މިނިސްޓްރީގެ ފަރާތުން ދައްކާ ވާހަކަ އާއި މި ހާދިސާ ހިނގިތަނަށް ދިޔަ ފުލުހުންގެ ބަސް ތަފާތުވެއެވެ.
އެތެރޭގެ ތަޙުޤީޤެއް ހިންގެވި ކަމަށް މީޑިޔާގައި ހައުސިން މިނިސްޓަރ ވިދާޅުވި ނަމަވެސް އޭގެ ތަފްސީލެއް ނުދެއްވައެވެ.
މީޑިޔާތަކުން މައުލޫމާތު ފެތުރުމުގައި ހަމައެއް ލަމައެއް ނެތް!
ރައްޔިތުންނާއި ހަމައަށް މައުލޫމާތު ފޯރުކޮށްދިނުމުގެ ޒިންމާ ކޮޑުގައި އަޅައިގެން މަސައްކަތްކުރާ ބަޔަކަށް ވީ ހިނދު ރައްޔިތުންނާއި ހަމައަށް ސައްޙަ މައުލޫމާތު ފޯރުކޮށްދިނުމަކީ ކޮންމެ މީޑިޔާއެއްގެ ވެސް ޒިންމާއެކެވެ. އެހެން ނަމަވެސް ހިތާމަވެރި ހާދިސާތަކުގެ ވަގުތުގައި އެއް ނޫހަށް ވުރެ ކުރިން ޚަބަރު ގެނެސްދިނުމަށް އުފެދިފައިވާ ވާދަވެރިކަމުގެ ތެރެއިން، ސައްޙަ ނޫން ޚަބަރުތައް ވެސް ގެނެސް ދީފައި އެބަހުއްޓެވެ.
ފަހުގެ ތާރީޚުގައި ރާއްޖޭގައި އެކްސިޑެންޓެއްގައި ނުވަތަ އެހެން ވެސް ހިތާމަވެރި ހާދިސާއެއްގައި މީހަކު ނިޔާވެއްޖެ ނަމަ މީޑިޔާތަކުން އިސްކަން ދެނީ އެމީހުންގެ ފޭސްބުކް ޕްރޮފައިލް ހާވައިލައިގެން ކޮންމެވެސް ފޮޓޯއެއް ނޫހުގައި ޖަހާލެވޭތޯއެވެ. ނަމަވެސް މިކަމަކީ އެމީހުންގެ އާއިލާތަކަށް ކިހާބޮޑު ހިތާމައެއް ލިއްބައިދޭނެ ކަމެއް ކަމެއް އެމީހުން ވިސްނައެއް ނުލައެވެ.
މީގެ އިތުރުން ރާއްޖޭގެ ބައެއް މީޑިޔާތަކުގެ ނޫސްވެރިން ޖަނާޒާތަކަށް ގޮސް މައްޔިތާގެ ސަންދޯއް ވަޅަށް ތިރިކުރާއިރު ވެސް ފޮޓޯ ނެގުމާއި، ސަހަރާތެރޭގައި އިންޓަވިއު ނެގުމުގެ މަސައްކަތް ކުރަމުން ގެންދާ ކަމީ ވެސް ހިތާމަ ކުރަން ޖެހޭކަމެކެވެ.
ސިޔާސީ މީހުން ޕްރޮމޯޓް ކުރަން ބޭނުންވަނީ އަމިއްލަ އެޖެންޑާއެއް !
ދިވެހިރާއްޖެ އެކަންޏެއް ނޫނެވެ. ދުނިޔޭގެ ހުރިހާ ޤައުމެއްގައި ވެސް ސިޔާސީ ދާއިރާގައި މަސައްކަތް ކުރާ މީހުންގެ މަޤްސަދަކަށް ވެފައި އޮންނަނީ ކޮންމެ ވެސް މޮޅު ވާހަކަ އެއް ދައްކާލައިގެން މީހުންގެ ސަމާލުކަން އަތުލެވޭތޯއެވެ. ވަކިން ޚާއްސަ ގޮތެއްގައި ކާރިސާތަކުގެ ވަގުތުގައި ސިޔާސީ ވާދަވެރިންގެ ބަލިކަށިކަން ދެއްކުމަށް ސިޔާސީ ފަރާތްތަކުން މަސައްކަތް ކުރެއެވެ.
މިގޮތުން ރާއްޖޭގައި ވެސް ހިތާމަވެރި ހާދިސާއެއް ހިނގާއިރަށް ސިޔާސީ ފަރާތްތަކުން މަސައްކަތް ކުރަނީ މައްސަލައަށް ހައްލެއް ހޯދުމުގެ ބަދަލުގައި ކޮންމެވެސް އަމިއްލަ ފައިދާ އެއް ހާސިލް ކުރުމަށެވެ. ސަރުކާރަށް ނިސްބަތްވާ ފަރާތްތަކުން މަސައްކަތް ކުރަނީ އެމީހުންގެ ސަރުކާރުގެ ކުށެއް ނެތްކަން ދެއްކުމަށެވެ. ސަރުކާރާއި ދެކޮޅު ފަރާތްތަކުން ބޭނުންވަނީ ދަނޑިވަޅުގެ ބޭނުންކޮށްގެން ސަރުކާރުގެ އަގު ވައްޓާލުމަށެވެ.
ސޯޝަލް މީޑިޔާގައި ތަންކޮޅެއް މައިތިރި ވާންޖެހޭ !
ޚިޔާލު ފާޅުކުރުމުގެ މިނިވަން ކަމުގެ ނަމުގައި އެއްވެސް ބެލުމެއް ނެތި ސޯޝަލް މީޑިޔާގައި ކޮމެންޓްތައް ކުރުމާއި ތަފާތު ޕޯސްޓްތައް ކުރުމަކީ އަޅުގަނޑުމެންގެ މުޖްތަމަޢްގައި، އެކަމަކަށް ހައްލެއް ހޯދަން ޖެހިފައިވާ ކަމެކެވެ.
މިއީ މިއަދު އަޅުގަނޑުމެންގެ ރާއްޖޭގައި ވަރަށް ބޮޑު ވެފައިވާ މައްސަލައެކެވެ. ހިތާމަވެރި ދަނޑިވަޅުތަކުގައި އަޅުގަނޑުމެން އެންމެން ވެސް މަސައްކަތް ކުރަންވީ އެކަކު އަނެކަކަށް ކުށްވެރި ކުރުމުގެ ބަދަލުގައި އެހެން މީހުންގެ ހިތާމަތަކަށް ލުޔެއް ހޯދައިދިނުމަށެވެ. ނުވަތަ ދިމާވެފައިވާ މައްސަލަތައް ހައްލު ކުރުމަށެވެ. ޚާއްސަގޮތެއްގައި ހިތާމަވެރި ހާދިސާތަކުގެ ޚަބަރުތަކަށް ގިނަ މީހުން ކޮށްފައި ހުންނަ ކޮމެންޓްތައް ބަލާލުމުން އަނެކާގެ އިހްސާސަތަކަށް ކުޑަކޮށް ވެސް އިހްތިރާމެއް ނުކުރާކަން ފާހަގަވެގެން ދެއެވެ.
މީގެ އިތުރުން ހިތާމަވެރި ހާދިސާތަކުގައިި ނިޔާވާ ފަރާތްތަކުގެ ފޮޓޯތައް އެމީހުންގެ އާއިލާގެ ހުއްދަނެތި ބޭނުންކުރުން ވެސް މިވަނީ ހުއްޓާލަން ޖެހިފައެވެ. ތިމާގެ އާއިލާގެ މީހެއްގެ ފޮޓޯތައް ސޯޝަލް މީޑިޔާގައި ދައުރުވާން ނޭދޭ ފަދައިން ތިމާގެ އަޚާ ނުވަތަ އުޚްތާ ވެސް އެފަދަ އިން ނޭދޭނެ ކަން ވިސްނަން ވެއްޖެއެވެ. ހިތާމަވެރި ހާދިސާތަކުގެ ވަގުތުގައި ތިމަންނާއީ އެންމެ ރީތި ފޮޓޯ ނެގި މީހާ ކަމުގައި މަޝްހޫރުވާން މަސައްކަތް ކުރުމުގެ ބަދަލުގައި ތިމަންނާ އަކީ ހިތާމަ ލިބިފައިވާ އާއިލާގެ ހިތާމަތައް ލުއިކޮށްދޭން ކޮންމެވެސް ގޮތަކަުން މަސައްކަތް ކުރަން ޖެހެއެވެ.