މި ރޯދަ މަހު ބާޒާރުގައި ތަކެތި އެންމެ އަގުހެޔޮކޮށް ލިބެން ހުރި ފިހާރަތައް އެނގޭނެ "އަގުމަގު" ޕޯޓަލް ލޯންޗުކޮށްފި އެވެ.
މި ޕޯޓަލް ލޯންޗުކޮށްދިނީ އިކޮނޮމިކް މިނިސްޓަރު މުހައްމަދު ސައީދު އެވެ.
އިކޮނޮމިކް މިނިސްޓްރީން ބުނީ އަސާސީ ކާބޯތަކެތި ރައްޔިތުންނަށް އަގުހެޔޮކޮށް ފޯރުކޮށްދިނުމަށް ސަރުކާރުން ގިނަ ސިޔާސަތުތަކެއް ތަންފީޒުކުރަމުންދާ ކަމަށާއި މި ޕޯޓަލް އަކީ ވެސް އެ ސިޔާސަތުގެ ދަށުން އެކުލަވާލި ޕޯޓަލްއެއް ކަމަށެވެ. މި ޕޯޓަލް މެދުވެރިކޮށް އަސާސީ ކާބޯތަކެތީގެ ހެޔޮ އަގުތައް އެއްތަނަކުން ފެންނަން ހުންނާނެ ކަމަށް މިނިސްޓްރީން ބުނެ އެވެ.
We are pleased to launch AguMagu1446, a dedicated portal that provides up-to-date prices of the essential food items in one place. https://t.co/Z3ccdaQy22#RoadhaigeRoohu pic.twitter.com/6Ld1llbsNz
— Ministry of Economic Development and Trade (@MoEDmv) February 28, 2025
މި ޕޯޓަލުން ފެންނަން ހުންނާނެ އަގުތަކަކީ އިކޮނޮމިކް މިނިސްޓްރީގެ އިންސްޕެކްޝަން ޓީމްތަކުން ކޮންމެ ހަފްތާއަކު ފިހާރަތަކަށާއި ބާޒާރުތަކަށް ގޮސް އެއްކުރާ މައުލޫމާތުގެ މައްޗަށް ހިމަނާފައިވާ އަގުތަކެއް ކަމަށްވެސް މިނިސްޓްރީން މައުލޫމާތުދެ އެވެ.
މިނިސްޓްރީން ބުނީ މި ޕޯޓަލްގައިވާ އަސާސީ ކާބޯތަކެއްޗަކީ ބައިނަލްއަޤްވާމީ އަދި ރާއްޖޭގެ ކަމާބެހޭ އިދާރާތަކުން އަސާސީ ކާބޯތަކެތި ކަމަށް ކަނޑައަޅާފައިވާ މިންގަނޑުތަކަށް ރިއާޔަތްކޮށް ތައްޔާރުކޮށްފައިވާ ލިސްޓެއް ކަމަށެވެ.
މިވަގުތު މި ލިސްޓުގައި ހިމަނަން އަގުތައް މޮނީޓާ ކުރަމުން އަންނަނީ މާލެ އަދި ހުޅުމާލޭގެ ފިހާރަތަކެވެ. ނަމަވެސް ކުރިއަށް އޮތް ތަނުގައި މި މަސައްކަތް އަތޮޅުތެރޭގެ ރަށްތަކަށް ވެސް މި މަސައްކަތް ފުޅާކުރުމަށް ހަމަޖެހިފައިވާ ކަމަށްވެސް މިނިސްޓްރީން މައުލޫމާތުދެ އެވެ.