މޯލްޑިވްސް ޕޯޓްސް ލިމިޑެޓް (އެމްޕީއެލް) ގެ އޯކްޝަން ޕޯޓަލްއިން މެދުވެރިކޮށް އައްޑޫ ހިތަދޫ ޕޯޓުގެ ނީލަންތަކުގައި ވެސް ބައިވެރިވެވޭނެ އިންތިޒާމު ހަމަޖައްސައިފި އެވެ.
އެމްޕީއެލް އިން މިއަދު ނެރުނު ނޫސް ބަޔާނެއްގައި ބުނީ އޯކްޝަން ޕޯޓަލްގައި ރަޖިސްޓްރީވެފައިވާ ފަރާތްތަކަށް، އިތުރު އެއްވެސް ފީއެއް އަދި ރަޖިސްޓްރޭޝަނަކާ ނުލާ ހިތަދޫ ޕޯޓުން ހުޅުވާލާ ނީލަންތައް މިހާރު ފެންނާނެ ކަމަށެވެ.
އެގޮތުން އެއް ވަގުތެއްގައި ތަފާތު ނީލަންތަކުގައި ވެސް އެ ކަސްޓަމަރުންނަށް ބައިވެރިވެވޭނެ ކަމަށްބުންޏެވެ.
އެމްޕީއެލްގެ އޯކްޝަން ޕޯޓަލް 2022 ވަނަ އަހަރު ތައާރަފުކުރީ މާލެ ވިޔަފާރި ބަނދަރަށް ގެނެސް ގިނަ ދުވަސްވެ، ކްލިއާ ނުކޮށް ހުންނަ މުދާ ނީލަން ކިޔުމުގައި ގިނަ ބަޔަކަށް ފަސޭހަކަމާ އެކު ބައިވެރިވުމުގެ ފުރުސަތު ފަހިކޮށްދިނުމުގެ ގޮތުންނެވެ. މި ޕޯޓަލްގައި މިހާތަނަށް ބައިވެރިވެވެނީ ހަމައެކަނި މާލެ ބަނދަރުގެ ނީލަންތަކުގައި އެކަނި އެވެ. ނަމަވެސް ހިތަދޫ ޕޯޓުގެ ނީލަންތައް ޕޯޓަލަށް އިތުރުކުރުމުން، ރާއްޖޭގެ ކޮންމެ ތަނެއްގައި ހުރެގެން ވެސް އެ ޕޯޓުގެ ނީލަންތަކުގައި ބައިވެރިވެވޭނެ އެވެ.
އެމްޕީއެލުން ބުނީ ހިތަދޫ ޕޯޓުގައި ހުންނަ މުދާތައް ގަތުމަށް ނީލަމުގައި އޮންލައިންކޮށް ބައިވެރިވެ، ބިޑްކޮށް ފައިސާ އޮންލައިންކޮށް ދެއްކޭނެ އިންތިޒާމު މިހާރު ހަމަޖެހިފައިވާ ކަމަށެވެ. އަދި ނީލަމުގައި ބައިވެރިވާ ފަރާތުން ގަންނަން ބޭނުންވާ މުދަލުގެ ހުރިހާ މައުލޫމާތެއް ވެސް ޕޯޓަލް އިން ލިބޭނެ ކަމަށް ބުންޏެވެ.
ހިތަދޫ ޕޯޓަށް ގެންނަ މުދާތަކުގެ ތެރެއިން އާންމުކޮށް ގޮތެއްގައި ކްލިއަނުކޮށް ގިނަ ދުވަސްވެގެން ނީލަމުގައި ވިއްކާލަނީ ހަތަރު ފުރޮޅުލީ އެއްގަމު ވެހިކަލްތަކެވެ.
އެމްޕީއެލުން ބުނީ ކުރިއަށް އޮތް ތަނުގައި ކުޅުދުއްފުށީ ޕޯޓުގެ ނީލަމުގެ ހިދުމަތްތައް އޯކްޝަން ޕޯޓަލް މެދުވެރިކޮށް ބައިވެރިވެވޭނެ ހިދުމަތް ތައާރަފްކުރުމަކީ ވިސްނުމެއް ކަމަށެވެ.