ފަސް ރަށަކަށް އައިސް ޕްލާންޓްރައް ސަޕްލައިކޮށް އެތަކެތި އިންސްޓޯލްކޮށް ދޭނެ ބަޔަކު ހޯދަން ފިނޭންސް މިނިސްޓްރީން އަލުން ބީލަމަށް ހުޅުވާލައިފި އެވެ.
އެ ފަސް ރަށަކީ ކުޅުދުއްފުއްޓާއި ށ. ކޮމަންޑު އާއި އއ. ރަސްދު އާއި ހއ. ދިއްދޫގެ އިތުރުން ގދ. ރަތަފަންދޫ އެވެ. މިނިސްޓްރީން ބުނީ އެ ފަސް ރަށުގައި އައިސްޕްލާންޓް ބަހައްޓަނީ މަސްވެރިކަމުގެ ސިނާއަތު ތަރައްގީ ކުރުމަށްޓަކައި ސައުދީ ފަންޑް ފޮ ޑިވެލޮޕްމަންޓުން ލިބިފައިވާ އެހީން ކަމަށެވެ.
އެހެންވެ ފަސް ރަށަށް އައިސް ޕްލާންޓް ސަޕްލައިކޮށް އިންސްޓޯލްކޮށް ދޭން ޝައުގުވެރިވާ ފަރާތްތަކަށް ބީލަން ހުށަހެޅުމުގެ ފުރުސަތު މި މަހުގެ 13 އާ ހަމައަށް ވަނީ ހުޅުވާލައިފަ އެވެ. މި ބީލަމުގެ ބިޑް ސެކިއުރިޓީ އަށް 250،000ރ. ހުށަހަޅަން ޖެހޭ އިރު، ބިޑް ސެކިޔުރިޓީގެ މުއްދަތަކީ ބިޑު ހުޅުވާ ތާރީޚުން ފެށިގެން 148 ދުވަހެވެ.
ބީލަމުގައި ބައިވެރިވާން ރަޖިސްޓްރީވުމުގެ ފުރުސަތު ހުޅުވާލާފައި ވަނީ މި މަހުުގެ 11 އާ ހަމައަށެވެ. ރަޖިސްޓްރޭޝަނަށް 1،500ރ. ދައްކަން ޖެހެ އެވެ.