ރޯދަ އަށް ހުންނައިރު، ހަށިގަނޑަށް ބޭނުންވާ މުޙިއްމު މާއްދާތަށް ހިމެނޭ ، ހަށިގަނޑުގައި ވަރުޖައްސައިދޭ ކާބޯތަކެތި ބޭނުންކު ރުމަކީ ވަރަށް މުޙިއްމު ކަމެކެވެ. އެގޮތުން، ތިރީގައިވާ މި ފާހަގަކޮށްލާ ތަރުކާރީތަކަކީ ރޯދަ މަހާއި އެނޫން މަސްމަހުގައި ވެސް ކެއުން ރަނގަޅު ތަރުކާރީތަކެކެވެ.
ކިއުކަމްބާ
ކިއުކަންބާގައި 95 ޕަސެންޓް ފެންހިމެނޭ އިރު، ހަށިގަނޑަށް ބޭނުންވާ ވިޓަމިން ކޭ އަދި ޕޮޓޭސިއަމް ވެސް ކިއުކަމްބާ މެދުވެރިކޮށް ލިބޭނެ އެވެ.
އެގޮތުން، ރޯދަ ވީއްލުމަށް ނުވަތަ ހާރު ކެޔުމަށް ތައްޔާރު ކުރާ ސެލެޑު އަދި ސޭންޑްވިޗްގައި ކިޔުކަންބާ ހިމެނިދާނެ އެވެ.
ފެހި ތަރުކާރީ
ސްޕިނަޗް، ކޭލް އަދި ލެޓިއުސް ފަދަ ފެހި ތަރުކާރީގައި ހަށިގަނޑަށް ބޭނުންވާ އަޔަން، ފައިބާ، ވިޓަމިން އޭ، ވިޓަމިން ސީ އަދި ކެލްޝިއަމް ހިމެއެވެ. މިއީ، އިންސާނާގެ ހަޖަމީ ނިޒާމާއި ވަރުބަލިކަން ކުޑަކުރުމަށް ބޭނުންވާ މުޙިއްމު މާއްދާތަކެކެވެ.
މިފަދަ ފެހި ތަރުކާރީގެ ބާވަތްތަކަކީ ރޯދަ ވީއްލުމަށް ތައްޔާރުކުރާ ބޯކިބާ، ސޭންޑްވިޗް ފަދަ ތަކެތި ހެދުމުގައި ބޭނުންކުތެވިދާނެ ތަރުކާރިތަކެކެވެ.
ކެރެޓް
ކެރެޓަކީ ވިޓަމިން އޭ، ފައިބާ އަދި ހަށިގަނޑުގައި ދައުރުވާ ސެލްތައް ހިމާޔަތށް ކުރުމަށް ބޭނުންވާ އެންޓިއޮކްސިޑަންޓްސް ހިމެނޭ ތަރުކާރިއެކެވެ.
ރޯދަ ވީއްލުމަށް ތައްޔާރު ކުރާ އެކި ކަހަލަ ކާބޯތަކެތީގައި ކެރެޓު ބޭނުން ކުރެވި ދާނެ އެވެ. އެގޮތުން، ޖޫސް ހެދުމާއި ސެލެޑުގައި ބޭނުންކުރުމުގެ އިތުރުން އާންމުކޮށް ކެޔުމަށް ގެންގުޅޭތަކެއްޗަށް ކެރެޓުކޮޅެއް ގާނާލުމަށްފަހު އަޅާލެވިދާނެއެވެ.
ޓޮމާޓޯ
ޓޮމާޓޯ ނުވަތަ ވިލާތު ބައްޓަކީ ވިޓަމިން ސީ، ޕޮޓޭސިއަމް އަދި ހިތުގެ ބަލިތަކުގެ ހިމާޔަތްކޮށް ދިނުމަށް ބޭނުންވާ މުޙިއްމު އެންޓިއޮކްސިޑަންޓްސްއެއް ހިމެނޭ ތަރުކާރިއެކެވެ. އެގޮތުން، ރޯދަ ވީއްލުމަށް ނުވަތަ ހާރުކެޔުމަށް ތަފާތު ވައްތަރުގެ ރިހަ އަދި ސޯސްތަށް ތައްޔާރު ކުރަމުން އަންނަ އިރު، ޓޮމާޓޯ ބޭނުން ކުރެވިދާނެ އެވެ.
ކައްޓަލަ
ކައްޓަލަ އަކީ ހަށގަނޑަށް ބޭނުންވާ ކޮންޕްލެކްސް ކާބޯހައިޑްރޭޓްސް، ފައިބާ އަދި ވިޓަމިން އޭ ހިމެނޭ ތަރުކާރީއެކެވެ. މި ތަރުކާރީ އަކީ ރޯދަ އަށް ހުންނައިރު ވަރުބަލިކަން ކުޑަކޮށް ދިނުމުގައި އެހީތެރިވެދޭ ކާނާއެކެވެ.
އެގޮތުން ރޯދަ ވީއްލުމަށް އަދި ހާރު ކެޔުމަށް ކައްޓަލަ ފެނުކައްކައިގެން ނުވަތަ ފިހެގެން ވެސް ތައްޔާރުކޮށް ލެވިދާނެ އެވެ.
މައުލޫމާތު: އެގްރިކަލްޗަ މިނިސްޓްރީ