މިމަހުގެ 15 ވަނަ ދުވަހު ފެށުމަށް ހަމަޖެހިފައިވާ މިނިވަން 50 ޗެމްޕިއަންޝިޕްގައި ބައިވެރިވާ ފޭދޫ ޓީމް، މަޝްހޫރު ވިޔަފާރި ކުންފުނި ހެޕީމާކެޓުން، 94،000 ރުފިޔާއަށް ސްޕޮންސާ ކޮށްފިއެވެ.
ރޭ ފޭދޫގައި ބޭއްވި ރަސްމިއްޔާތެއްގައި ޓީމް ސްޕޮންސާރ ކުރުމުގެ އެއްބަސް ވުމުގައި ސޮއި ކުރީ ހެޕީމާކެޓްގެ ފަރާތުން ހެޕީމާކެޓް ނައީމްގެ ކޮއްކޮ އަދި ފުޓްބޯޅައަށް އަގުހުރި މަސައްކަތްތަކެއް ކުރައްވަމުން އަންނަ ކުރީގެ މަޝްހޫރު ފުޓްބޯޅަ ކުޅުންތެރިއާ އިބްރާހިމް ލުޠުފީ (ހަންޑާ)އެވެ.
ފޭދޫ ޓީމްގެ ފަރާތުން ސޮއި ކުރީ އަލީ ސަރީރް (ޕީޓާ)އެވެ.
މީގެ އިތުރުން ފޭދޫގެ ޒުވާނެއްކަމަށްވާ އަހްމަދު އަހްޔަދު ވަނީ ޓީމަށް 10،000 ރުފިޔާގެ ފައިސާގެ އެހީއެއް ވެދީފައެވެ.
މިނިވަން 50 ޗެމްޕިއަންޝިޕްގައި ބައިވެރިވާ ފޭދޫ ޓީމުން ޕްރެކްޓިސް ފަށާފައިވާ އިރު އެޓީމް ދަނީ އެކުވެރިކަމުގެ މެޗްތައް މެޗްތައްވެސް ކުޅެމުންނެވެ. އެގޮތުން މުބާރާތުގައި ބައިވެރިވާ މީދޫ ޓީމާއި އެކު މެޗެއް ކުޅެ 3-1 ލަނޑުން ވަނީ މެޗް ކާމިޔާބް ކޮށްފައެވެ.
މި މުބާރާތުގައި އައްޑޫން ބައިވެރިވެފައިވަނީ ފޭދޫގެ އިތުރުން މަރަދޫފޭދޫ އާއި ހިތަދޫ އަދި މީދޫއެވެ. މުބާރާތް ކުޅޭނީ ހޯމްއެންޑް އަވޭ އުސޫލުން ހަފްތާ ބަންދުގައެވެ.