މާލޭގެ އެކި ސަރަހައްދުތަކުގައި ކޮތަރުތަކެއް މަރުވުމާ ގުޅިގެން ހެދި ޓެސްޓުތަކުންބައްޔެއް ޖެހިފައިވާކަން ދައްކާ ކަމަށާއި އެކަމަކު އިންސާނުންނަށް އޭގެ ސަބަބުން ނުރައްކަލެއް ނެތް ކަމަށް ދިރޭތަކެއްޗާ ބެހޭ މިނިސްޓްރީން ބުނެފި އެވެ.
އެ މިނިސްޓްރީން ނެރުނު ބަޔާނެއްގައި ބުނީ މާލޭގައި ގިނަ އަދަދެއްގެ ކޮތަރު މަރުވަމުންދާކަން ފާހަގަކުރެވުމާ އެކު އެކަމުގެ ހަގީގަތް ދެނެގަތުމަށް ސާމްޕަލް ނަގައި ހެދި ޓެސްޓުތަކުން އެ ކޮތަރުތަކަށް ޖެހިފައިވާ ބައްޔަކީ އިންފެކްޝަންސް ކޮރައިޒާ ކަމަށެވެ.
"މި ބައްޔަކީ އާންމުކޮށް ދޫނި ނޭވާލާ ނިޒާމަށް ޖެހޭ ބައްޔެއް. މި ޑައިގްނޯސިސް ބިނާވެފައިވަނީ ބަލި ފެތުރިފައިވާ ގޮތާއި، ބަލީގެ އަލާމާތްތަކާއި، ނެކްރޯޕްސީ ހޯދުންތަކާއި އަދި ލެބޯޓްރީގެ ޓެސްޓުތަކުގެ މައްޗަށް،" މިނިސްޓްރީން ބުންޏެވެ. "މިއީ އެވިބެކްޓީރިއަމް ޕެރަގެލިނޭރަމް ނަމަކަށް ކިޔާ ދޫނީގެ ނޭވާލާ ނިޒާމަކަށް ހަމަލާދޭ ބެކްޓީރިއާއެއްގެ ސަބަބުން ޖެހޭ ބައްޔެއް،"
މިނިސްޓްރީން ބުނި ގޮތުގައި ތަހުލީލުތަކުން ދައްކާ ގޮތުގައ ކޮތަރުތަކަށް ކޮކްސިޑިއޯސިސް، ކެންޑިޑިއޭސިސް އަދި އެހެނިހެން ބެކްޓީރިއަލް އިންފެކްޝަންތައް ޖެހިފައިވެފައިވެ އެވެ. އަދި އިންފެކްޝަން ކޮރައިޒާގެ އިތުރުން ސެކަންޑަރީ ބެކްޓީރިއަލް އިންފެކްޝަންތައް ޖެހުމުގެ ސަބަބުން ބަލި ބޮޑުވެ، ދޫނި މަރުވާ ކަމަށް ވެސް ބުންޏެވެ.
މިނިސްޓްރީން ބުނީ އެ ބަލި ޖެހުމުން ނޭފަތުން ފެން އައިސް، ދޫނި ކެއްސައި ނޭވާ ލުމަށް އުނދަގޫވެ، ބޮލާއި މޫނު ދުޅަވެ، ކެއުން ބުއިމަށް އުނދަގޫވާ ކަމަށެވެ. އެކަމަކު އެ ބައްޔަކީ ކުޑަ ދުވަސްކޮޅެއްގެ ތެރޭގައި އޭގެ ޒާތުގައި އަމިއްލައަށް ކޮންޓްރޯލްވާ ބައްޔެއް ކަމަށް ވެސް ބުންޏެވެ.
މިނިސްޓްރީން ބުނީ ބަލިން އިންސާނުންނަށް އެއްވެސް ނުރައްކަލެއް ނެތް ނަމަވެސް، ރައްކާތެރި ގޮތަކީ މަރުވެފައިވާ ކޮތަރު ނުވަތަ ބަލިވެފައިވާ ކޮތަރުތަކާއި ކުޑަކުދިން ކައިރި ނުކޮށް، ބޮޑެތި މީހުން ވެސް އެތަކެތީގައި އަތްލައި ހިފައި އުޅޭއިރު، ރައްކާތެރިކަމުގެ ވަސީލަތްތައް ބޭނުން ކުރުން ކަމަށެވެ.