އައްޑޫ ސިޓީ ލިންކް ރޯޑް މަރާމާތުކުރުމުގެ މަސައްކަތް 1.3 މިލިއަން ރުފިޔާއަށް މޯލްޑިވްސް ރޯޑް ޑިވެލޮޕްމަންޓް ކޯޕަރޭޝަން (އެމްއާރުޑީސީ)އާ ހަވާލުކޮށްފިއެވެ.
މިއަދު މެންދުރު ހައުސިންގް މިނިސްޓްރީގައި އޮތް ރަސްމިއްޔާތެއްގައި އެ މަސައްކަތް އެމްއާރްޑީސީއާއި ހަވާލުކުރުމުގެ އެއްބަސްވުމުގައި ހައުސިންގ މިނިސްޓްރީގެ ފަރާތުން ސޮއިކުރެއްވީ ހައުސިން މިނިސްޓަރު ޑރ. މުހައްމަދު މުއިއްޒެވެ. އަދި އެމްއާރްޑީސީގެ ފަރާތުން އެއެއްބަސްވުމުގައި ސޮއިކުރައްވާފައިވަނީ އެމްއާރުޑީސީގެ މެނޭޖިން ޑިރެކްޓަރު މުހައްމަދު ނަޒީމެވެ.
މިރަސްމިއްޔާތުގައި ވާހަކަފުޅު ދައްކަވަމުން މިނިސްޓަރ މުއިއްޒު ވިދާޅުވީ، ލިންކް ރޯޑް މަރާމާތުކުރާއިރު، މަގުމަތީގެ ނިޝާންތަކާއި މަގުގެ އެކި ހިސާބުތަކުގައި ސްޕީޑް ބްރޭކަރުތައް ހަރުކުރާނެ ކަމަށެވެ. އަދި މީގެ އިތުރުން ވެލި މަގުތަކުގައި ދޭތެރެ ދޭތެރެއިން ފަސްގަނޑު އެއްވަރުކޮށް، މަރާމާތުކުރުން ވެސް ދާއިމީކޮށް އެމްއާރުޑީސީން ކުރިއަށް ގެންދާނެ ކަމަށެވެ.
ލިންކް ރޯޑް މަރާމާތުކުރުމުގެ މަސައްކަތް ނިންމަން އެމްއާރްޑީސީ އާއި އެކު އެއްބަސްވެފައިވަނީ ތިން މަސްދުވަހުގެ ތެރޭގައެވެ.
މުއިއްޒު ވިދާޅުވީ މަގުތައް ހައުސިން މިނިސްޓްރީގެ ދަށަށް ބަދަލުކުރުމާއެކު، އެންމެ ފުރަތަމަ ކަމެއްގެ ގޮތުގައި ކުރިއަށް ގެންދަން ނިންމީ މަގުތަކަކީ ސަލާމަތީ ގޮތުން ރައްކާތެރި ތަނަކަށް ހެދުން ކަމަށެވެ. އެ މަސައްކަތް ނިމޭއިރު ލިންކް ރޯޑަކީ އެންމެންނަށް ވެސް ރައްކާތެރި އަމާން ތަނަކަށް ވާނެ ކަމަށް މުއިއްޒު ވިދާޅުވި އެވެ.
ލިންކް ރޯޑް ހެދުމަށް އެމްއާރްޑީސީ އާއި ހަވާލުކުރި އިރުގައި ލިންކް ރޯޑުގެ އެކި ހިސާބުތަކުގައި ވަޅުގަނޑުތައް ހެދި މަގު ބޭނުންކުރާ މީހުންނަށް ބޮޑެތި ދަތިތަކާއި ކުރިމަތިވެފައިވާކަން ފާހަގަކޮށްލެވެއެވެ.