ގައުމީ އެއާލައިން، މޯލްޑިވިއަނުން އިތުރު ވައިޑް ބޮޑީ ބޯޓެއް ހޯދަން ކުރި އިއުލާންގެ މުއްދަތު އިތުރުކޮށްފި އެވެ.
އެ އެއާލައިން މޯލްޑިވިއަން އޮޕަރޭޓްކުރާ އައިލޭންޑް އޭވިއޭޝަން ސާވިސެސް (އައިއޭއެސް) އިން ބޯޓެއް ކުއްޔަށް ހޯދަން އިއުލާންކުރީ މިދިޔަ މަހުގެ ކުރީކޮޅު އެވެ. އޭރު ބީލަން ހުހަޅަން ދިނީ ހަފުތާއެެއްގެ މުއްދަތެވެ.
ނަމަވެސް މިހާރު މުއްދަތު ވަނީ މި މަހުގެ 14 އާ ހަމައަށް އިތުރުކޮށްފަ އެވެ.
އައިއޭއެސް އިން ބުނީއެއާބަސް އޭ-330-220 މަރުކާގެގެ އިތުރު ބޯޓެއް ކުއްޔަށް ނަގަން ބޭނުން ވަނީ ފަސް އަހަރުގެ މުއްދަތަށް ކަމަށް ބުނެފައިވެ އެވެ.
މޯލްޑިވިއަނުން އަންނަނީ ޖެނުއަރީ މަހުގެ ތެރޭގައި ކުންފުނީގެ ފުރަތަމަ ވައިޑް ބޮޑީ ބޯޓް ގެނެސް ޗައިނާގެ ތިން ސިޓީއަކަށް ކޮންމެ ހަފުތާތަކު ތިން ދަތުރު ބާއްވަމުންނެވެ. އެ ދަތުރު ބާއްވާނީ ރާއްޖޭގެ މައި އެއާޕޯޓް ކަމަށްވާ ވެލާނާ އިންޓަނޭޝަނަލް އެއާޕޯޓް (ވީއައިއޭ) އާއި ޗައިނާގެ ބެއިޖިން، ޗެންގްޑޫ އަދި ޝަންހާއީއާ ދެމެދު އެވެ.
އަމާޒަކީ ދެން ގެންނަ ވައިޑް ބޮޑީގެ ދަތުރުތައް އޮކްޓޯބަރުގައި ފަށައި އިތުރު މަންޒިލްތަކަށް ވެސް ދަތުރު ފެށުމެވެ. އެގޮތުން ޔޫރަޕަށް ވެސް ދަތުރުތައް ފުޅާކުރަން ހަމަޖެހިފައިވެ އެވެ.