2014 ވަނަ އަހަރު އައްޑޫ ހައި ސްކޫލްގެ ހުރިހާ ގޮތަކުން އެންމެ މޮޅު ދަރިވަރަކަށް، އައިޝަތު މަނާލް ޚާލިދު ހޮވިއްޖެއެވެ.
ރޭ ޝަރަފުއްދީން ސްކޫލް ހޯލުގައި ބޭއްވި އިނާމް ދިނުމުގެ ޖަލްސާގައި މަނާލް އަށް އިނާމާއި ތަށި ހަވާލުކޮށްދެއްވީ އެ ހަފްލާގެ ޝަރަފްވެރި މެހެމާން މިނިސްޓްރީ އޮފް އެޑިޔުކޭޝަންގެ ސްޓޭޓް މިނިސްޓަރ އަހުމަދު ޝަފީޢުއެވެ.
ރޭގެ ހަފްލާގައި ސްޓޭޓް މިނިސްޓަރ ދެއްކެވި ވާހަކަފުޅުގައި ކޮންމެ ކުއްޖަކީވެސް ކާމިޔާބު ކުއްޖަކަށް ވެވިދާނެ ކުއްޖެއްކަަމަށާއި އެކަމަށް ބޭނުންވަނީ ހިތްވަރާއި އެކުގައި މަސައްކަތްކުރުން ކަމަަށް ވެސް ސްޓޭޓް މިނިސްޓަރ ވިދާޅުވިއެވެ.
ރޭގެ ހަފްލާގައި، ވޭތުވެ ދިޔަ އަހަރު އައްޑޫ ހައި ސްކޫލުން މަތީ ވަނަތައް ހާސިލްކުރި ދަރިވަރުންނަށް ވެސް އިނާމް ދީފައިވެއެވެ. 2014 ވަނަ އަހަރުގެ އޭ ލެވެލް އިމްތިހާތނުގެ ޤައުމީ ގަދަ ދިހައެއްގައި އެ ސްކޫލްގެ 12 ދަރިވަރަކު ހިމެނުނު އިރު ސްކޫލްގެ ގަދަ ދިހައެއްގައި 13 ދަރިވަރަކު ހިމެނިފައިވެއެވެ. މީގެ އިތުރުން އޭލެވެލް އަދި އެޗް.އެސް.ސީ އިމްތިހާނުގެ އެކި އެކި މާއްދާތަކުން ވަނަތައް ހާސިލްކުރި ދަރިވަރުންނަށް ވެސް އިނާމް ދީފައިވެއެވެ.
މި ރަސްމިއްޔާތުގައި ސްޓޭޓް މިނިސްޓަރ ޝަފީޢުގެ އިތުރުން އައްޑޫސިޓީގެ މޭޔަރ އަބްދުﷲ ޞާދިގާއި އައްޑޫގެ ސްކޫލުތަކުގެ ވެރިންނާއި އެހެނިހެން މުއައްސަސާތަކުގެ ވެރިން ވެސް ވަނީ ބައިވެރިވެވަޑައިގެންފައެވެ.
2011 ވަނަ އަހަރު ހުޅުވި އައްޑޫ ހައި ސްކޫލަކީ އައްޑޫ ސިޓީގައި މަތީ ޘާނަވީއަށް ކިޔަވައިދޭ ހަމައެކަނި ސްކޫލެވެ.