ދިވެހި ސަރުކާރުގެ ސިޔާސަތުގައި ހިމެނޭ އެއްވެސް ކުއްޖަކު ބާކީ ނުކުރުގެ ޕްރޮގްރާމް ތަންފީޒު ކުރުމަށް އައްޑޫ ހައި ސްކޫލުން އަމިއްލައަށް އިސްނަގައިގެން އެ ފުރުސަތު ދަރިވަރުންނަށް ހުޅުވާލާފައި ވާތީ އެކަމަށްޓަކައި އެ ސްކޫލުގެ ޕްރިންސިޕަލާއި މެނޭޖްމަންޓަށް ޝުކުރުއަދާކުރައްވަވާ ކަމަށް މިނިސްޓްރީ އޮފް އެޑިޔުކޭޝަނުގެ ސްޓޭޓް މިނިސްޓަރ އަޙްމަދު ޝަފީއު ވިދާޅުވެއްޖެއެވެ.
ސްޓޭޓް މިނިސްޓަރ އަޙްމަދު ޝަފީއު މިގޮތަށް ވިދާޅުވެފައިވަނީ، ރޭ ބޭއްވި އައްޑޫ ހައި ސްކޫލްގެ 2014 ވަނަ އަހަރުގެ އިނާމު ދިނުމުގެ ޖަލްސާގައި ވާހަކަ ދައްކަވަމުންނެވެ.
ޝަފީޢު ވިދާޅުވި ގޮތުގައި އައްޑޫގައި ތިބި އޯލެވެލް އިމްތިހާނު ނިންމާ ހުރިހާ ދަރިވަރުންނަށް ހައިސްކޫލުގައި ކިޔެވުމުގެ ފުރުސަތު އެސްކޫލުން ހަމަޖެއްސުމުން އެކަމާ ވަރަށް އުފާފުޅުކުރައްވަވާ ކަމަށެވެ.
އައްޑޫ ހައި ސްކޫލްގައި އޯލެވެލް ނިންމާ ހުރިހާ ދަރިވަރުންނަށް ފުރުސަތު ހުޅުވާލާފައިވި ނަމަވެސް، އެ ސްކޫލްގެ ދަރިވަރުންނަކީ ޑިސިޕްލިން ރަގަޅު ކުދިންތަކެއްގެ ގޮތުގައި ފާހަގަކޮށްލެވެއެވެ.